106 年全國語文競賽原住民族語朗讀【卡群布農語】 國小學生組 編號 1 號
qalua’ cin balinoqaz

ihan maklang tu qani’an, matingmut ta qalua’ masanminoqo’, na kitnga tansosoluk palalotu munata maqasmav kikilim mi kokonun, nadenpucun han lumaq, muaz za balinoqaz maldiqanin cilicilicili cilicilicili tu’i’ia tusauc tu’aniv vi kaviaz cia muskun paqaqenan, malisvala miqumic, ni tu miliskin tu na makuaq unisin.

masan kapupuaq qa lukic ismut kalac na konun tu qani’anan, muaz za balinoqaz maldiqanin malisvala, miliskin tu langat malqalmang nga kokonun, mastan kanahipun na qani’an! sadu ka balinoqaz zi qalua’ tu malqama’aq qa aingkun cuna tinbacbac coqescoqes ancacaqan ni tu pandudu.

tupa’un ni balinoqaz za qalua’ tu: malqama’aq qa amu cuna, ni tu pandudu maqasmav sala tinbacbac ancacaqan, mintuna mu mal’u, samuqa maszang zaku tusasauc, ni qa macihal, ni a qalua’ pandu antalam balinoqaz tupa tu: ni cam maqtu maszang su’u, muaz tusasauc malisvala maca han kapupuaq qa kokonun tu qani’an, asa tu maqasmav kavava madenpuc kokonun na ma’aq qa konun maca na makazhavin.

macalaqet ta balinoqaz tan’a, tupa ka is’ang ngi balinoqaz tu temangkasaz mavalavala miliskin nit ni’angni’ang sala kadip pa makazhav.

ni tu talpia ka minmakazhavin na diqanin, kaliluvluvin na diqanin makazhav tu luvluv va lapavan, uka’in na kokonun maqtu kilimun ma’un, muazin na balinoqaz matukuis matutokhav katangkatang tongqaztongqaz daukdauk mululuslus mudadan han lapavan tu qani’anan ti.

qaltu lapavan makazhav tu qani’anan na’, ni a qalua’ macalpu ikumbu’ i lumaq malisvala, abuqan mama’un ni kokonun.

manahip pa qalua’ ilumaq malu, minsuma a balinoqaz ihan hilav vi qalua’, makiscaiv han qalua’ tu ceving cak tikicun konun, masoqzangdengaz cak, namataz zi soqzang!

tinquza’ a’ qalua’ sadu ki balinoqaz, tupa’un ni qalua’ tu: ei! tupi su’u ka muaz tusasauc tu balinoqaz za! kunbu’a’ lumaqtun, ma’un kokonun ni’, maca minlangatin na, na moqna’ tusac pinahip pi is’ang tu sintusauc patana’ zamin, pis’u’usaq qa balinoqaz zi kenahipan tu usaq, matumacqeng ica qalua’ tu sinkadaidaz.

106 年全國語文競賽原住民族語朗讀【卡群布農語】 國小學生組 編號 1 號
螞蟻與蟋蟀的故事

夏天,螞蟻們每天一大早便辛勤的工作,蟋蟀則天天「嘰哩嘰哩,嘰嘰、嘰嘰」地唱歌,遊手好閒。對於螞蟻辛勤工作感到非常奇怪,便邀請螞蟻們休息一下,一同唱歌,但螞蟻仍然繼續工作不休。

冬天到來,冷風吹著,天空下著雪。蟋蟀消瘦,也找不到食物。螞蟻則存了食物,並建立溫暖的家。 

當蟋蟀找到螞蟻的家時,螞蟻們正快樂的吃著東西。螞蟻們嚇了一跳。趕緊拿東西給蟋蟀們吃,面對著善良親切的螞蟻們,蟋蟀留下欣喜的眼淚。

文章資訊
文章年度106
文章編號1
文章組別國小
文章語別卡群布農語
族語標題qalua’ cin balinoqaz
漢語標題螞蟻與蟋蟀的故事
文章作者全茂永Atul manqoqo
漢語摘要