107 年全國語文競賽原住民族語朗讀【南勢阿美語】 國中學生組 編號 4 號
U ’urip i cacudadan

I panan nu cacudadan ira kiya masilsilaytu a abinung atu kilang. I lanu’ nira kilang i, sabangcal sa kira baru a macelak, teli’sa a melawan ku cacudadan nu niyam. I ruma a bacali, ira ku mamelawan tu maama;an a picudadan, u tin-naw atu masamaanay a sasalamaan, matiya u alumanay ku tamdaw a paluma’an. Salipahak sa kaku a micudad tu remi’ami’ad, itila aluman ku cabay nu maku, malecapu kami a micudad, i pipahanhanan namicudad, saruyaruy sa kami a mihulul, a micakay tu mamedacen, tangasa satu i kalahukan malecapu a keman tu sakalahuk, herek sa namalahuk i, henaba satu kami amin a mabuti i sapad nu tireng. Suelinay i cacudadan, pihaceng a matengil ku suni’, u nipi’asip tu cudad, u radiw atu tawa i cacudadan, saremi’ami’adsa kami a micudad, milaylaytu tireng atu minanam tu sakabana’  tu tamdaw atu sakangudu a demak.

U sakalipahakan a nananaman itini, u ka’ulahan nu maku ku sapilaylaytu tireng atu radiw a minanam. Anu sibuduy tu kaku, tu sapilaylay a buduy i, sakapah saan ku tireng, ma’ulah kaku a mimali, a mabekac tu mililiay, anu milili a mabekac u salikulay kaku, ira nipabesbes nu maku, atu belung nu kaput a pakakilemel, sisa u saayaway tu kaku. Tuna mahaen matenes a lipahak tu remi’ami’ad kaku. I karemadiwan satu, caay kanca patalaayawen nu pasebanaay kaku a palingatu a pangiha a paradiw tu kaput, u rumasatu pasacacay han kaku a remadiw tu maan a radiwan, sisa mahemek ku kaput tu kapah nu radiw nu maku. Masuni satu ku pahanhanan, sakalamkam satu wamin kami, a misiremud tu cudad a pakay  kaway, herek a palesimet tu cudad, mikabang tu kami a maruyaruy a taluma’. Tangasa satu i pana nu cacudadan, ira mamuceremay a cidal sa atipuling saan ku cengel i kakarayan, i aayaw nu pana nira dadahalay a lalan nu cacudadan, saburesak saan kira cengel a mamelaw. Pihaceng ku ’ulah nu maku, tina sabangcal sanay a cacudadan. U kangalayan nu maku a saremiremiad saan, a tayni i cacudadan, a minanam tu masamaanay a nananaman. Atu salipahak sanay a ma’urip itini i picudadan tu remiremiad a kaput amin.

107 年全國語文競賽原住民族語朗讀【南勢阿美語】 國中學生組 編號 4 號
校園生活

校園兩旁有高高的椰子樹,大樹下有排列整齊的杜鵑花,校園的另一端是圖書館,裡面陳列許多書籍,是我們學習新知的地方。還有體育館、電腦教室,及各種遊樂設施。

我每天都快樂的去上學,跟朋友們一起上課,下課時一起玩耍,有時也會上福利社,中午吃著豐盛的營養午餐,一起趴在桌上睡午覺。校園最常聽到的是讀書聲、音樂聲及歡笑聲,我們每天在校園裡讀書、鍛鍊體魄及學習做人處事的道理,這裡是學習的天堂。

我最喜歡體育課和音樂課,喜歡賽跑及打躲避球,大隊接力時,我都是最後一棒,全力衝刺到達終點贏得勝利。音樂課老師總會叫我示範發音,有時也會獨唱給大家聽,同學們一直誇我唱歌好聽。

下課鈴聲響起,大家忙著收拾書包準備回家,走在校門口看著黃澄澄的夕陽,灑在校門口的林蔭大道上,我的校園真美,我愛我的校園。

文章資訊
文章年度107
文章編號4
文章組別國中
文章語別南勢阿美語
族語標題U ’urip i cacudadan
漢語標題校園生活
文章作者張美妹
漢語摘要作者張月瑛
漢語摘要