108 年全國語文競賽原住民族語朗讀【宜蘭澤敖利泰雅語】 國中學生組 編號 2 號
spyalun nku mrkyas ru mkrakis

maki ku spyalun ta ita c’oli lga, mosa myasa ku sngsun ta m’yanux babaw uraw hani. aring ta la’i cikuy ga, yaba yaya ta t’aring ci psba’ ita maha kenu m’yanux. kyalun ta nya yaba yaya maha, mluw ta gaga Tayal ga, kwara myasa yaw ini heri’ gaga ga, ana ta lokah mtiyaw. ana ga, maha ini ta gluw gaga Tayal, kwara ya’eh yaw ga, ana utux iyat ta mosa ptyawun.

hopa hayi la’i Tayal lga, t’aring mosa m’was pwasan biru. aring kya maki psba’ biru mwah psba’ kwara la’i mrkyas ru mkrakis, t’aring tkba’ ru tmwang knba’an yaw na babaw uraw. kmayan ku psba’ biru maha, lokah ta m’was biru ga, piyux yaw ba'un ta mosa mtiyaw. piyux yaw waya ba’un lla’i mrkyas lga, thoyay maki myasa spiy naha ru myasa knxan naha babaw nya. ana ga, ini ta lokah m’was biru lga, piyux ci yaw iyat ta ba’un mnglung ru mtiyaw. ana nanu ini ta kba’ mnglung ru mtiyaw lga, iyat thoyay maki myasa spiy naha ru myasa knxan naha babaw nya.

nanu yaca ku, la’i mrkyas ru krakis na Tayal ga, siga maki myasa spiy nha, babaw nya lga, thoyay mluw mosa mkaraw m’was hopa pwasan biru. kruma ga mosa tkba’ san kenu mosa m’omah uraw mayah naha. kruma ga mosa tkba’ san kenu mosa kble sali. kruma ga smoya galan psba biru, kruma ga smoya galan kesacu, kruma ga smoya mosa maki hetay, kruma uyi ga smoya mosa galan pkhgup mga’ing. kwara myasa yaw hani ga, mosa naha san myasa ci spiy na lla’i mrkyas ru mkrakis na Tayal.

ana ta mosa mheyaw myasa spiy na lla’i mrkyas ru krakis na Tayal ga, utux ci hopa yaw lungun ta ga, iyat ta nbah mosa mungiy ima ita ru, kahun inu kwara kholan ta alang Tayal.

108 年全國語文競賽原住民族語朗讀【宜蘭澤敖利泰雅語】 國中學生組 編號 2 號
少年人的夢想

人有夢想,活在世上就有美好的生活目標。小時候,爸爸媽媽最先教導我們要怎樣生活,要遵守泰雅的祖訓,有違祖訓的事,連一件都不可行。

長大後,泰雅少年開始到學校學習,開始學習知識。老師說,努力讀書就有能力去做很多事。少年人認真學習知識,對未來就有夢想,也會有美好的生活。不認真學習,對很多事就會無知,也沒有能力做任何事。當一個人對任何事都無知,又沒有能力去做任何事,就不可能有美好的夢想,未來也不會有美好的生活。

有的人可以學習如何好好耕種的農業知識。有的人可以學習如何蓋房子的知識。有的人可以學習做一位老師。有的人可以學習將來做一位警察。有的人可以嚮往做一個軍人。有的人可以學習做一位醫生。這些美好的理想,都可以成為泰雅少年人美好的夢想。

泰雅的少年人,要時常謹記一件重要的事,不可忘記自己是誰,更不要忘記泰雅族人的家鄉。

文章資訊
文章年度108
文章編號2
文章組別國中
文章語別宜蘭澤敖利泰雅語
族語標題spyalun nku mrkyas ru mkrakis
漢語標題少年人的夢想
文章作者Yuhaw Piho 林約道
漢語摘要