朗聲四起

Kndkilan ta saya de, ini pntena daha ka cbeyo di. Cbeyo hayan we ita Seediq ka mosa ta mprigo alang pngerah, mosa ta msange alang ani nniinu duri. Knbrinah seediq alang iicil ka meyah mprigo alang ta saya di.

Uxe duri we, ani seediq mneeyah Tayriku, Tanah Tunux, Dame Doriq ma, kana seediq laalang nniinu, uxe ta gnklaan meyah mprigo alang ta hini. Saya de ani naq alang seediq, ini pntena kklegan nyahan, ini pntena kari ma ini pntena gaya, nii ta mggaluk ma msbleyaq ta saya di.

Seediq daha ka seediq we, ga kndudul msdaling nyahan ta di. So mstheya ta nniqan na Dame Doriq nii, netun ta taapa sapah skiya mprigo nniqan daha peni. Yaani maha kingal rabi ma daha rabi hari tnqiyan de, dehuk ta alang daha di. Ririh kntheya bale han, so hari gaga msdaling alang daya nana. 

Bale ba ka saya duri, knkingal nyahan daha rmigo alang ta seediq mprigo nii. Meeyah smiling qyqeya dooyun rudan ta cbeyo, mkmaruy so pala tninun, lukus rudan ta cbeyo, tninun ta tokan qwarux, bruru qwarux daha ka kulu hlama. Kana meeyah mekan pnhpure ppuqun rudan ta cbeyo… dnii.

Niqan ka lnlungan daha mkmeeyah slluhe dmoi tminun pala, tminun rawa. Msuupu muuyas uyas, kmeeki, qmita kndesan alang ta, mekan ppuqun hnprayan daha mqedil alang duri. Mqaras bale seediq mprigo madis tnsapah daha ka dangi, meeyah rmigo alang ta hini.

Knxalan saya, so nii asi eyah remux alang ta seediq kaalang we, maha uxe ba dhekun lmngelung drudan ta cbeyo. Ado ka ini mhemuc madis seediq kaalang, meeyah mtheyaq alang ka rudan ta cbeyo, asi naq msdadan ka mstheyaq. Ani naq so nii, wada ka kiya di. So qrasun bale ka seediq meeyah rmigo alang ma sdngiyun ta. Huwa ta kesun pgkela ita nSeediq ka dheya? Maanu ka pgklaun ta dheya duri?

Dungan duri we, huwa ta kesun pqita ita nSeediq ka dheya nii? Maanu spkela ta pqita gaya ma kndusan ta ka dheya nii? Asi ta naq spuun lmngelung ma pgkela ka dheya. Kisi niqan nrihan daha meeyah mprigo alang ta hini ma, stgesa ta “Yami kesun ka Seediq ba Bale”.