朗聲四起
rali’ rali’ ci kaca, kelan kutux ka ule’ kanel, ma’ilang ci ma’ilang caṟung. ana musa’ mumaṟah mumaṟah ni’ karirex, ini’ bah musa’ taxan ka atu’ ni. kuba’ nak musa’ mabel lu musa’ salahaw mumaṟah ki. ana kasangun na yaba’ yaya’ ni ga, ini’ kasa anamol ka linlungan ni. minlu ini’ gigi na nabkis ni mumaṟah la ga, ini’ bing ana amol ka ule’ kanel hani la.
utux rex maṟabuna’ sasan. kumaṟal hiyan ka yaba’ yaya’ ni “usa’ lumamu’ tikiy ci singut kay sun naha!” wal cubay mukura’ mumaṟah taxan ka ule’ kanel hani, ga, tehuk cacka’ na rex. musa’ matox mumaṟah hiyan ka tanmoṟow ni. wah! ana’ utux rablung singut ini’ ni lamuy, ungat taxan ka ule’ kanel hani’ uṟi, maku’ masang ka tanmoṟow ni matox cika inoh na ule’ kanel hani. “wal salahaw inu’ ka ule’ ṟakeh hani luṟi?” yonani masang ka linlungan na nabki kumaṟal. ini’ naha hura’i kumaṟal ka ilang na ule’ hani. pasaring ci kaca laga, as naha’ nak laxani lu ini’ naha’ kalahngi la.
malawa’ ci habaṟaw na ci’uli’ musa’ mararow lumamu ci singut ki ka yaba’ yaya’ ni. ini’ kabuse’ ga, wal naha su’un lumamu’ ka singut la. pasasilen naha’ka ṟula’ upak na singut, tongan naha ci kahuni’. culingun naha mumaṟah ki. katana’an cubay maculing ci yaba’ ka ṟana’ ci kaca. wal as kux pungan maha “ paras ” mulaka’ ka tukara’ minoh cika ṟana’ upak na singut ki, bale’ pataw! taw! maha’; “ yaya’ cu na ilang kung, wal cu mutukara’ la, as ka angṟat cu malahang ci ṟablung na sukiy lu buy na kahuni’ kaca ka pakatangi’ cu inohan ma. ” maku nak masaṟux matox ci tanmoṟow ni’ la, kani ka wal mukura’ tuhya’ mulaka’ ka ule’ kanel wal mutukara’ hani’ la.