朗聲四起

ka temakesikesi aen ta kukumingqaku, kisuqadaqadau a patjemasulem a qucan sakamaya ta sengsengan ti ama. a sitjumaq nimadju kiqilja mata kakisupuan ta qadupu nimadju, qau, izua a maqevaqevau ta vaveciken. nu kaikaiv amen maqati a lemengeljeng tjaimadju, ljakua ayatua ikapusalu ti ina a madradrusidrus nu kamakan amen, avan nu madraudrau tu kigalju a sikanan, sa kapalak a kacavacavan, avan nu nia sipadjadjeli a patatideq ta kakanan a cukui, a maljavar tu ita tu drusa kaiyan.

u paqenetjen aza kakaiyan ni ama, “ saigu sun ta su kakituluin? ” “ izua su vaveciken? ” “ nu izua su pinakasarukuya i varung tjumalji aen sakamaya. ” tjalja tjenglayan a kilangeda ta vilivililjan a kay. ljaki qaqunuan anan a en, ljakua “ a pinakasarukuya pinivarung ” liyau aravac. saljinga en tu izua na semedjalu a ramaljeng tu paseqeljing tucu a u pinakapazangal a pacugan. nu makakan, tedep anan ti ama ta kakisupuan. salim a en ta u vaveciken uta, ljakua ikana patjesazek a u vinaringan. ti ama neka nu tjenget tu makakai a men ta salimanan, a u suqelaman, tjara pinucugan anga ni ama.

nu sikadrusaqadau a kadjamadjaman, tjemaulaula ti ama ta tigami pita u cukui. azua, vincikan nimadju nu qemacuvung anga ta sengsengan ita salilim a vengin. sinipacuru ta inikana maqacuvung a kai nu kemakan a men, situlutulu ta u pinakapazangal, sa tulekan aen ta djalan. saka avan a u sikigaljuan a pacun, tjenglai aen pita ljavac na sapitj, sa u kisupui nu na semkez a en ta kitulu i kungkuan, ki namaya ta lemangdangda ta kai ana semedjalu ni ama.