朗聲四起

Kndusan saya u paru bay kpriyux ka kana ana manu da. Ou bay ini pntna ka kndusan saya mi cuxal. Sow quri lnglungan ta kana sediq babaw dxral u wada so turu uxay uri o rima kngkawas ka iyax na da, wada knhuway mrana bay knpriyux mi ini pntna da. So kari “ priyux ” nii u, kika balay bay elu uuda saya ka kiya.

Kingal kari so quri uuqun ta kndadax kndusan ta sediq babaw dxral hini saya u, Cuxal u mhuma ta cikoh sari mi bunga daw hmuc ta musa bbuyu miying mangal uqun dow, kika ana manu mnudus daw, mqaras ta bay mkan mi mttngi kiya da. Ini kmlamu prana pnngalan mi tmabu knkluwan mnudus mi mttuku bay kana da. Saya daw nii prana bay smmalu knkluwan phmaun mi kana tnbuwan. Ana manu uuqun mi mahun mi ddiyun u mttuku bay kana. Uka ka ini bay dhqi smmalu. Pblayaq mi pktngi bay pkan ana manu sediqun. Ana bay rabang knmalu ka kndusan ta sow nii saya da.

Quri sow lklukus u ini bay tuku ka cuxal han. saya u lnlamu knkluwan ka lklukus mi pnspingan, ini bay snqlingi dmuuy mi wada mrana bay knpriyux kddiyax kana. Quri sow nniqan ta knkluwan spsapah u paru mi mdhu bay, ini kiicu bwihur paru mi runu. kana tqian, hpuyan, qsiya… ana manu ddiyun kcka sapah u mttuku bay kana. Uxay Kiya daw niqan kana ka uuda ta muudus babaw dxral u pusu dnuuy, knkluwan elu paru uuda, ttsa, kmlawa qpahun klwaan, alang, qqlahang qcahur mi qbubur, knsyangan smnluun knqiya… dnii bbliqun sediq muudus babaw dxral u wada paru bay knpriyux mi psblayaq bay kndusan ta kana saya da.

Kiya mi ana sow nii paru bay mblayaq bay ka sediq babaw dxral saya u niqan ou bay mrana ka mquri naqah uri. Uxay malu bay kana. Sow sqian psaan sapuh ka dxral mi ana manu uuqun sediq daw ana manu mqraqil mnarux criyu uri da. Sqian ta mhhraw qnbliqan lipax kndusan sediq babaw dxral u rinah mrana knnaqah ka lnglungan sediq uri. Kiya uka ka ksun balay bay sediq da. Asi ta bay knbiyax msupu pskingal bay lnglungan psbrinah lmnglung malu muda kana dungan. Sow msupu bay muudus mi mrana kana ka mniq ta babaw dxral.

過去與現代的生活大不同。從飲食生活來說，傳統生活除了種些地瓜芋頭外，隨意至野外採集食物就飽，一切很足夠。而現代種植各類作物、養殖畜牧類，應有盡有，充足有餘。

現代人雖有這樣大的幸福生活，也漸漸有很多負面的部分。如土地過度使用肥料，用在人的飲食上，也影響了健康。人類過度追求外在的物質享受，時人內心惡念也漸多。理當努力專心反省，好好的去做，願在世能共存共榮。