朗聲四起

Sbiyaw balay han o, “ Furmosa ” ksun dha ka Taywan, yaasa mpajiq bbuyu qtaan ka Taywan, qqsiya yayung o mtasaw bi qtaan uri, ini kpiya ka seejiq uri. Rudan sbiyaw o ida msblaiq bi mnniq iyax knsyangan mpajiq bbuyu ni mtasaw eyyayung, ungac qtaan ka ssunu ni rngsux qsiya knhmuc muda mapa sapah alang ni pnegalang seejiq uri.

Alang Seejiq balay seuxal o gaga dgiyaq kana, qqhuni kana ka kiyig sapah. Kiya ni egu bi klgan ka pnhiyugan sapah, niqan ka sapah snalu qhuni, niqan ka sapah snalu djima, niqan ka sapah snalu btunux uri. Qyqaya pphiyug sapah o ida mnangal kiyig nniqan nanaq kana, mnkiya balay qtaan.

Seejiq balay ksun ga niqan tru klgan hnang kari, saw ka dSeejiq Truku, dSeediq Tgdaya ni dSediq Toda, ana nanaq saw nii o ida mtna ka knkla kndusan. Mniq daya hari Seejiq o qqhuni ka ssalu dha sapah, mniq truma hari o ddjima ka ssalu dha sapah. Duma na hiya o gmimax qqhuni ni bbtunux shiyug sapah. Pusu balay o nasi qmuyux do, ini sslii qsiya, smbu paru hidaw o ini kcilux nniqan uri. Nasi miyah mrmux klealang ka esisil seejiq o ini pkxali mrmux. Tru klgan Seejiq balay ksun ga ida niqan cicih uri ka ini hari ktna uuda, malu uri ka saw kiya.

Paah sbiyaw kiyig nniqan alang, qnpahan ni dupan lmiqu o niqan Tayal, Bunun. Dhiya ga ida niqan nanaq Gaya dha uri, saw ka Tayal o “ Gaga ” msa, Bunun o “ Samu ” msa. Ida niqan nanaq elug dha pslutuc knkla kndusan uri, ini ta bi knhmuc mppseeluk. Ida mtna hmuma masu, bunga, sunguc dnii. Niqan nanaq dupan dha lmiqu ssaan dha tmsamac.

Seejiq balay ni Tayal ksun ga mntna hari ka knkla kndusan uri, saw ka Gaya ptasan dqras, mstrung, tminun pala, tminin rawa ni brunguy dnii. Kiya ni kmlawa Taywan siida ka Tanah Tunux do asi ta dha ksi “Tayal” kana da. Bukuy do yaasa egu bi ka ini ktna kari, kiya ni kmbiyax meysa hangan ka Seejiq balay. Hici do qulung phiyug hangan “ Seejiq ” hngkawas dha kbkuy maspac idas spac jiyax empusal spac da. Bitaq sayang Bunun ni Seejiq ga msdangi bi na, mpsparu bi pqqita, ana ini ktna ka knkla kndusan, ida egu bi wada msstrung ka mbiyax risaw ni uwa uri da.

Seejiq balay sayang ida tnhjilan Tanah Tunux kana da, uxay saw seuxal ka kndusan sayang uri da. Yaasa niqan ttgsa pyasan, wada mgimax mseupu kana ka knkla rudan sbiyaw uri. Ana nanaq saw kiya o mtduwa msdangi ni msblaiq bi ka tnsapah ni klealang do malu da.

賽德克族有三種語群，Truku群、Tgdaya群、Toda群之分別，大致上來說，居住在較高山區的社群以木造為主，較低的社群則以竹造為主，有的社群也以石材材料木質混合造屋者，主要的功能是排水良好、冬暖夏涼、易防難攻。我們跟泰雅族有許多相同的文化，如紋面、織布與編藍、背簍文化等…，所以以前曾被歸屬於泰雅族，在族人努力下終於在2008年4月23日正名成功。