朗聲四起

Haiza tas’a qamutis asnii ihaan anak’anak lumaq masabaq, muqa aipa asa inata hauzavhauzav miqumis. Miliskin aipa tu namudaan munata kilim i mastaan masihal tu takdada’an. Minkalapat aipa haan lukis, munkunbu’ haan  sinuk i luqi. Ihaan aipa puspus lukis ta. Namasabaqin dau ka, haiza qan luvluv daingaz a minsuma a, kalinluvluvun a lukis a, vuqvuqun luvluv ta ka sinuka; qudanan qan, tuduqan a sinuk, tailuvusun dau ka qumutisa. Ansasuu tu tunlalavi aipa lukis ta bisukbisuk, nii aipa maliduduu masabaq, mudaan aipa haan sinuk ta. Maisnahaan aipa lukis munastu, munhaan aipa vanis tu sinuk taluszang i vanis masabaq. Ihaan dau aipa qalimudungan tu ismuut a, isungngan aipa vanis i luak tu na’asabaqan istaa. Ihaan dau misqang maqmut a, makazhav dau ka sapalana. Aupa luvus a dalaq nastu, damuqan dau ka isiata dangi’anan. Luvus a aisabaqana, nii aipa amin maliduduu tasutsanavan i’ita. mudaan aipa maisnahaan sinuk ki vanisa. Tupa aipa tu, “ Nii qana sinuk vanis masihal dangi’anan. ”

Kilim aipa patulkukan munkunbu. Madia a tulkuk ihaan laipaz patulkukan ta mal’uu masabaq, qabinun naita bungu mapunhaan nastu ki pani intaa. Nii dau aipa maqtu munkunbu tulkuk ta tu pani. Misqang maqmutin a, mapu’niq dau ka tulkuk masabaq ihaan patulkukan ta, tini aipa nitu usabaqan. Aupa uka dau ka hilhilun, makazhav dau. Mudaan aipa haan patulkukan ta.

Maqmut daingazin, ukain a dangi’anan masabaq. Tataultaul aipa mulumaq. Tau’un istaa ka lumaq hilav, a saduu aipa isiata tais’aan tu mapu’niq amin masabaq, pisihalun i tamatina isiza ki pusut mapahilhil. Haiza tas’a mansisila’in tu dangi’anan, haiza amin a pusut niang sinulpak. Miliskin dau ka qamutisa tu sinpalsanus aipa isiata tamatina napaisiata. Sizaun istaa ka pusuta mahilhil, tudiipin dau aipa lipu’niq masabaq. Tupa dau ka qamutisa tu ;“ Tutuza tu sia anak’anak tu lumaq a mastaan tu masihal dangi’anan. “

有隻老鼠不喜歡自己的家，喜歡在外遊蕩。想去找更好的住所。牠爬到樹梢上的鳥巢，被大雨淋濕，樹也搖晃著睡不安穩，就離開樹。牠去山豬的巢臼裡，冷冰冰的，住處整晚是霧，睡不安穩，就走了。牠又到鴨寮去，只見鴨子們各自躲進自己的翅膀裡，也不讓牠進去，牠冷得直打顫，且鼻涕直流、咳嗽，牠便快速地離開。

夜很深了，牠回到自己的家。看見雙親和兄姊弟妹們甜美地睡臥在自己的床上。他說：「原來還是自己的家才真的好住！」