朗聲四起

Haiza dau tatini tapudavus tu qaqanup bunun, maaq aipa a tuqaqaun bunun tu mastaan maqansiap qanup. Musqa tu nii dau aipa maqtu pasaduan i davus.

Haiza tu tas-a qanian, masabaq aipa mataisaq haiza tatini madaingazin tu bunun taqu istaa tu: “ Uuvaz-az! Saivak aas tas’a tunpu’, amaav pihaan lutbu suu. qabasin anatupa aas tu malkakamaaq, kaa tuza tunpu un laktanan.” Bibinazin a madaingaza a, minkaila a qaqanupa. Kanasia aipa madaingaz ta tu qalinga mama ki tupu, nitu dau laktanan istaa.

Haiza tu tastuqanian, paqudan dau aipa duma bunun i davus. mulumaq dau ka, lasuun aipa ihaan daan. Minsuma qana tumaz mama istaa mapundaza haan lukis sinuk, na-ispakaun i auqaz istaa. Aupa uka qaimangsut iskali’luq ki bungu bunun ta, munastu a tumaza siza ki batu. Kalinluvluvun dau ka minispaskat bununa, tispalkav aipa minuqu, tinquza aipa tu lakuaq sata iska lukis daza ti tu? Lusqa dau ka mata usaduan i auqaz tumaz, saduu tu maaq a tumaz a angkus i batu na minkalapat i lukis. “ Na mi’uni qan ata hiap kakaunun intuun? ”Sapsapun istaa ka tunpu ihaan hubung, katdikusa istaa ka pa’anan tunpu’, sangsangun istaa ka auqaz tumaza, minsumain a maskun namapataz zaku un. Musqa aipa kanatunpu masangsang i tumaz ta tu bungu. a muqqalqal a tamaz pananastu mataz. Tupa dau aipa tu, “Alnanaizaq niiaak  tan’a madadaingaz ta tu qalinga, almatazi aak haip qanian.” “Maaq sata miniqumis tu taus’uvaz’azun i tina a, nanuin a diqanin tu masaiv ita vaivivavi tu tamasaz sii taiklas, kanasia mita bunun nitu mapisihal ikma’ia. Paqpun nitu maqtu minsia ka sinkuzakuza, pimama’az i diqanin sinsaiv mita tu sinpumazav.”

Munastu a qaqanup a, sababaiv i iniqumisan istaa, mintatulin daingaz aipa miliskin. Tupa ainpa tu: “nii aak maszang duma bunun tu masaihuu malkaquma, kasihalan i sinanaipuk. Lauqu nii a diqanin masaiv zaku maupa ti tu tamasaz siin taiklas.” “ A mavi aaak maqansiap malhaqu, ma’asik manaq?  Sia ti ka sinsaiv zaku?.” Paiskatudiip aipa malmananu qaqanup, niin ququd davus, mispapaskat. Tutuza dau aipa tu min’uniin i mamangan, kazimaun amin i bunun.

有一位獵人愛喝酒，一位老人對他說：「孩子呀！以後不論如何，作何事，你這把斧頭千萬不要忘記佩戴著。」他醉倒在回家的路上。熊就把他揹到樹上去，要當幼熊食物。當熊爬下樹找石頭時，涼風吹醒獵人，他用斧頭劈開幼熊的頭部，再用斧頭痛擊爬上來的熊。

他說：「我們獵人哪，斧頭本來就不能夠丟掉，因為我們的力量就在那。」