朗聲四起

Qabasang a, haiza dau tatini mangai tu bunun, Muqa aipa ilumaq mal’u’uu, asnitu kuzakuza. Miliskin dau ka bununa tu namakuaq aipa min’uni haiza’an tu bunun. Muqa tu nii aipa nakuzakuza.

Haiza tu tas’a qanian, masabaq dau aipa a. Mataisaq aipa tu haiza dau maisna haan diqanin tu bunun minsuma. Taqu ka bununa istaa tu : “Tupi na asa aas min’uni haiza’an tu bunun? Na takuaq aas tu namakuaq minhaiza’an. Muqa tu asa aas tu kapimaupa inaak tu sinbabazbaz kuzakuza ; Unisin a, na anqai aas vanglaz daingaz, na usadu’an aas vaivivaivi tu batu, maqtu aas siza ki sainidu’an suu tu batua. Maaq i sizaun suu ka batu mapunsaan ima suu tun a, na min’uni ka batua mabinsaq tu kiim, maqtu isbaliv a, na min’unin aas haiza’an tu bunun. Muqa tu muqa tas’a ka puna’imaun, maaq i musta’an a siniza a, na nii ka batua minkiim, nanii amin maqtu ibaliv suu. Maaq i angqai ki vanglaz daingaz ta a, asa tu makitusbut, katuu panduu, katu sakakiiv. Aupa na tingquza ka batua musbai, na siqabin a batua munhaan dalaq kunbu. Maaq i nii aas kapimaupa inaak sintataqu ka, namusuqis a kiima minbatu amin.”

Miliskin aipa tu langat i nii a bununa saduu, na sista’an dau aipa siza ki batu mapunhaan ima a, amuqis qaqsial dau ka kiima lananastu minbatu, niin maqtu uqnaun siza. Ansasuu dau tu niin maqtu musuqis siza ki taisbananin tu batu. Tupa dau ka min’i’ia batu tu bununa tu ; nahaizang a madadaing batu itanangaus ta, laktanan istaa matakunav a siniza’in istaa tu batua. Amuqis tasbananin a madadaing batu a, atitikisin amin a mankinuz tu batu.

Mintatulun aipa a, a sakakiiv aipa sintakunav istaa tu batua, tuqsup dau amin a batu saan dalaq kunbu, niin a bununa saqna’an saduu. Tispalkav a bununa a, tupa dau ka bununa tu, “Asa qana aak laupakadau tu matintamasaz kuzakuza, kain tu mangai.” Minnuqu aipa. Paiskatudiip aipa maqasmav kuzakuza, dungzavin dau aipa tutuza minhaza’anin tu bunun.

一個懶惰的人，整日想著要發大財。有天夢到天上的人說：「經過大河床會看見各種石頭，拿在手上會變成黃金，賣了就能富有。但一次只能拿一個，多拿會變成石頭，也不可以回頭看」。

果不其然，他經過大河床時拿起石頭變成黃金，但他貪心想多拿幾塊，黃金就滑到地上變回石頭，他心想前方還有大石頭，於是把撿過的石頭扔掉，未料前頭盡是小石頭。他後悔地回頭看，石頭躲進土裡看不見。那人醒了過來，從此就認真工作，終於成為富有的人。