朗聲四起

Rudan Truku sbiyaw ga pusu bi kndsan dha o qmpah dxgal, tmsamat o tkdayaw kndsan dha ka kiya, samat o pusu bi pnyahan uqun hiyi. Pusu bi qpahun snaw Truku o tmsamat, kmlawa sapah aji eiyah kmrmux pais, pusu bi qpahun kykuyuh o mmkay, mmiyak ni mseusa.

Qaya tmsamat o buji, puniq, pucing, sngqslan xiluy, smbrngan ni gasil qlubung. Knkla kneudus snaw Truku ka tmsamat, kiya o niqan qpuring tmsamat, burux tmsamat, rmuyuk, maduk, qmburang, powsa sngqslan ni powsa qlubung, duri o lmibaw, tmbabaw ni dmhaw.

Asi ka niqan bi mttuku knkla lnglungan dha mgaya quri mneudus ida nkiya ka emptsamat, kiya o niqan gaya tmsamat, keelgan saw psaniq tmsamat, bhring emptsamat, gaya qrunang, dxgal qrunang, tmquli llingay mneudus ida nkiya, kmriyux karat, balay bi kndsan samat, rmun ni biyax hiyi emptsamat, snlhayan knkla ni kkla tmsamat, saw nii ka knkla tmsamat o pusu bi qngqaya knkla kndsan tmsamat hnici rudan Truku.

Quri gaya kndsan tmsamat o saw nii, ini bi ptlngi kuyuh ka qngqaya tmsamat, niqan mhuqil, mstrung risaw ni wauwa ka alang o ini tduwa musa tmsamat, niqan mtucing laqi ka alang o asi sangay ini usa tmsamat ni asi brinah sapah kana, nasi ida miyux bi musa do ana manu strungun dha mqraqil aji uri o mhuqil, mmowsa bbuyu ka emptsamat ga asi ka psisil, qmita spi, snkrbutan nksaan ni qmita rngji rangaw. Paah saw nii qnita ka mtduwa musa ni ini tduwa musa tmsamat.

1. Srnabaw o ini tduwa musa tmsamat, yaasa samat o tmwawa ni tmquli wawa.

2. Rbagan o ini tduwa musa tmsamat uri, yaasa naqih elug ini biyaw sburaw ka samat,

3. Krpuhan o mtduwa musa tmsamat kiya, yaasa wada mdakil paru kana ka samat da.

4. Misan o mtduwa musa tmsamat uri, yaasa ini ksburaw nhari ka samat, paru kana ka samat uri da.

Mayig hiyi samat misan ni krpuhan o uqun dha srnabaw ni rbagan ini tduwa musa tmsamat siida. Gaya tmsamat nii o ana ima asi ka murug kana, ini tduwa smeeliq kana ka Truku. Yaasa nii o gaya hnici rudan ta Truuku sbiyaw.

狩獵重生態保育，與大自然共生。心理、修養、生活領域、自然現象上，獵人都應具備相關專業知識。如狩獵習俗、各種禁忌。獵場規範、地理、環境生態、氣候變化、獵物實況、體力膽識、技能知識、狩獵技術等。

狩獵有相關的禁忌。春季是動物生產期，禁獵。夏季氣候不穩，獵物若無法揹下山易腐爛。秋冬適合狩獵，注意氣候變化，避免凍死。獵肉可先燻乾，成為禁獵期的肉食來源，這是太魯閣族傳統狩獵習俗。