朗聲四起

Ungat ptasan ka nniqan rudan Truku mniq dgiyaq sbiyaw, kiya do prajing bi “ Sapah Ttgsaan Alang ” o sapah Truku sbiyaw, tama ni bubu ka mtgsa na.

8 hngkwasan na ka laqi snaw o stghuy tama tmatak kmbgurah dxgal tkuyan masu ni mhuma, stghuy tama musa tmsamat ni qmlubung, phiyug sapah. Smluhay dmuuy pucing ni buji, qaya tmsamat, smquri duhung, sru ni qngqaya cinun, tminun brunguy, bluhing ni towkan. Bitaq na klaun balay kana ka qqpahun snaw. 12 hngkwasan do prajing emburux nanak musa tmsamat ni qmlubung, qmpah qmpahan daya ni tminun saw djiyun snaw towkan, brunguy.

8 hngkwasan ka laqi kuyuh do stghuy bubu mmkay, mmiyak ni tminun qabang, miri. bitaq klaun dha balay ka qqpahun kuyuh. 12 hngkwasan do prajing emburux nanak mmkay, mmiyak ni tminun. kana saw qpahun kuyuh.

Spdakar bi rudan ka risaw ni wauwa mimah sinaw ni mkan lumak,yaasa smeeliq qbubur ni skrangi tunux. mdawi, gmeeguy ni ini pnegaya, msaang ni ini dha bi skxuli.

Saw nii 4 hngkawas snlhayan dha Sapah Ttgsaan Alang ka laqi snaw ni laqi kuyuh, klaun dha bi ka qqpahun snaw ni kuyuh, sbgay dha bukung alang ni muda ptpusu laqi, biqan bukung 4 keelgan pnskraya.

1. Biqan kari.(purug bi gaya tngsaan hnici rudan)

2. Biqan qngqaya kkeudus.

3. Mtduwa ptasan dqras.

4. Wauwa o mtduwa pstmay risaw sapah ni risaw o mtduwa pstmay wauwa sapah uri.(tduwa mstrung)

Smparu bi qmita ttgsa laqi ka rudan Truku sbiyaw, pslhbun bi kndsan laqi hici ka rudan sbiyaw uri.

Manu saw kiya do 8 hngkwasan dha ka laqi siida , tama o tmgsa laqi snaw, bubu o tmgsa laqi kuyuh, tgsaan dha gaya hnici rudan dha sbiyaw, kiya o smparu qmita rudan, kndsan mnegaya bi qqita dha rudan, gaya quri qqita dsnaw ni kykuyuh, embahang bi kari rudan, mstrung mangal kuyuh do kmlawa bi sapah, enduwa bi tmquli laqi, phiyug kingal emblaiq bi sapah.

早期深山無學校，孩子的教育落在父母身上。男孩八歲跟著爸爸上學習各種技能，十二歲要獨立完成。女孩八歲跟著媽媽學習做家務事、織布，十二歲要獨立完成。完成技能訓練的四年，舉行成年禮，部落領袖頒給象徵成年的標誌。太魯閣族重視家庭教育，關心孩子的生活，教導孩子習俗、祖先留下來生活規範（gaya）、禮節、生活、狩獵禮節等等。

長大孝順父母，敬重父母，聽父母的話。結婚時，照顧家庭，養育孩子，建立家庭。