朗聲四起

kakhayza’an hayza’ ka kakibizo’an minhae:ar ila. haeba:an kamakibizo’ masay, ma’ hayza’ pizpiza’ ka mae’iyaeh ’okay pasay haysiya ’i’iyaeh. ray ’inoka’ ka pinahiyo’ hoeroe’ honaehnge:, ’isa:a’ tihoero:en ila, ’ana hiya’ ma’ komoSa’ “ ’okay paka:i’ o! ”

soka’ kano’ pak’i’iyaeh hi lakamamatawaw? lasiya patpatemezeng ray ’ima ’iyasiwi’ hinoroe’, ray hina’azem ma’ ’am hayza’ ka kinSiwa’an! ma’ ’iyakita’ naehan ka pinaynaehpoe’! lasiya paspeng noka saboeh tinalhaehael komoSa’ kayni’ masay, ’am komita’ naehan ka hahila:, ’ana tiSikas nanaw ma’ kayzaeh. ’inakhini’an ka hina’azem, ma’ ’am pakpasay a pak’i’iyaeh ka mae’iyaeh mina! ray kinaskesan lo’aw’aw ’okay tihoero: ka ra:an, maySoSowaw ’iyapinae’rem min’alewez ila. mae’iyaeh So: mae’rem ila ma’ ’am ’okik ’i’iyaeh ila, ’okay kita’ ila ka hahila:. ’isahini So: ’oka’ ila ka kinSiwa’an, soka’ ’am nak’ino’ kaSkoraeh ka hini howaw?

noka ’amilika’ ’inalingo’ ’ina komoSa’, “’ana hiya’ ma’ pakhayza’ ka kinSiwa’an, pakhayza’ sowiti’ ka pinalomikas, ma’ ’izi’ i pak’akoey mina ’am papasizoeh!” hayza’ ka kinSiwa’an kayzaeh pakilwa’is rima’ komi:im ka tiniS’aliyaS. ’akoey ka kinSiwa’an ’am miyatabin ila, ma’ ’am poti’ ka hina’azem ’am maymaybih, mina ’izi’ a tomal pakpapasizoeh!

kinSiwa’an ’okik koSa’ tomil’itol ka hina’azem nonak, ma’ ponrowa’ ray ’ima kayzaeh ka hina’azem. mak’aehae’ papi ray hina’azem ka Siniwa’an, ra:amen ’am ’okik talsekel ma’ tatngor ila. hayza’ ka ’ima kayzaeh ka kinSiwa’an ’okik koSa’ ’okay hola’ ’in nonak a wa’is, mina talam sepeng nonak kakilwa’isan kapanra:anan. pak’es’es ka hina’azem, ’isa:a’ kayzaeh katatngoron.

hini hina’azem ’okik noka ’al’alak nanaw; ’ana tatini’ ma’ hingha’ hayza’ ka kinSiwa’an. ’isahini tatini’ tomae’aes ka kapatawawen ila ’okay patawaw, ma’ pakoSa’ nonak ’oka’ ila kakilwa’isan, sosmi’ael nanaw mahowiS a tomal. So: ’ima haeba:an ’az’azem sowiti’ noka tatini’ ka kin’i’iyaehan, pakra:am koSa’ tatini’ ma’ hayza’ noka sabsaboeh ka’inhaha:o’an, nakhini ma’ ’am kayzaeh sowiti’ ka hina’azem.

koSa’en ka kinSiwa’an, ma’ mita’ ray hina’azem ’ima tilka:an ka pinahiyo’. paktilka:an ma’ pakrikrika: pakha:olhoel hi nonak.