朗聲四起

Sakosizahen ray koko:ol ka kaehkaehoyan hahes’ezan kayzaeh a tomalan! mak’aehae’ manmanra:an ray ’oes’oeso’an pakhil’awan ka Sinarak, mangowip ila ka ’ima ’awmomza’ ka hina’azem. ray ’oem’oemaeh bazae’en ka SibSiba:i’ mam homngas; ma’ ponhoero:on ka miniSpapongaeh kayzaeh kasazeken. mak’aehae’ homaba:i’ ila bazae’en ’iya’zaw. ray ’oem’oemaeh kamanakhiza nanaw. ray koko:ol yako nakhara hil’awan ka hina’azem kinSiyae’ ’iyapina:tol ila.

haysani koko:ol naka ’ayaeh ila mayna:a’ ka sinsang ’am komita’ ka kak’ayaeh. mae’iyaeh mowa:i’ ko’oemaeh maySoSowaw siya ’ayaeh ila. mak’aehae’ koko:ol nak hi ’oya’, papabasez ka pongaeh, hinbetel, ki kaSiray ’oes’oeso’an kano’ kano’. koko:ol naka hopay a ta:an miyalawa’ ka kaSnay’oes’oeso’an saboeh.

ray koko:ol noka SibSiba:i’ hinngas; ray ba:la’ a lolongan ka bato’ ’arolon tatonotono’ bazae’en; hinaba:i’ bebebe: bazae’en naka lasiya mam ma:tol. hayza’ ka ’inay koko:ol ka pina:tol kakbazae’en, hini pina:tol pawa:i’ ka kaSnay’oes’oeso’an pahpaha:ih talsekel rini. yako ra:am ray koko:olan noka saboeh pina:tol pot’iSnga: a tomal, yayaya: bazae’en, ’akoey ka ’inokik hingha’ ka hinngas.

’oka’ o, koko:ol nakhara ’ayaeh ila. So’o ra:am ay koko:ol ’ampowa’ ’ayaeh? mae’iyaeh mowa:i’ ko’oemaeh minsalaz ka kinowih, koko:ol kita’en po’ih ila, ’oka’ ila ka ra:i’. moyo ’okik koSa’ pakpaka’alo’an ay? ’isa:a’ ’ita’ ta’in’ae:aew takalahangaw ka ’oem’oemaeh, ’izi’ i koSa’ hayza’ kamari’an pa’aewhay ka ’oemaeh. yako ’am min’ae:aew no koko:ol Sa’, “’izi’ i ko’oemaeh ila, koko:ol ’ayaeh ila!” paspeng nanaw So: ko’oemaeh pakkayzaeh ’omo:ol ka ra:i’ ki ralom. koko:ol ’isa:a’ ’am kayzaeh ’okay ’inhae:ar, ’okay ’aroli ka ra:i’ ’oemaeh ma’ ’am kayzaeh ila kita’en.

yako minowa’ ka koko:ol! siya pakhayza’ mita’ So: ray minaSangay ka’oSa’an kapanpanra:anan ka kita’en ka ’oem’oemaeh. yako minowa’ ka koko:ol! siya pase’el ka kaehkaehoyan, kaehoy romara’et ka ra:i’, ma’ hayza’ ka kasbez lo’arol ray ba:la’, pakhayza’ karae’oe:en. nisiya bino:ay ’akoey a tomal, ’isa:a’ yako ’am tiSkobae:oeh ’ini siya Sa’, “koko:ol nak hi ’oya’ papabasez ka saboeh, ’izi’ ila pa’aewhay ka ’oemaeh!”

山景色優美令人忘懷。有蟲鳴鳥叫花香。在山上可放鬆、愉悅唱歌。到山上走走，思緒會豁然開朗，像醫生治病。山孕育花草動物並保護之。溪流拍石，風呼呼地吹，像似山中的音樂會。氣氛吸引動物前來，聽到美妙又優雅的聲音。山病於過度開墾。別因貪念，做出傷害。請別過度開發，山病了！惟有水土保持，方能展現美好。

我喜歡山！是假日的好去處；我喜歡山！養育了森林保持水土及山泉使我們有水喝。山就像母親孕育萬物，請不要傷害它。