朗聲四起

tevelengae ’a ma’akaelela ka solate. lo masekelreni oteme macani mani ’akodhaadhaonga tovi, so’ete ’apolre’eni ta kasii’i soilro. ilrae la laa’adhili ’iniyaveelainai dhoace, ’isakevenai molatadhe, mani keteketenai li’ange toapaapange, paataheanai padhaace paopelai.

omi’a solate taidhi’i ’angato, i’adhidhaalingine tevelengae, omiki hingihingi ’angato liyavisi ’angato miimilriki ’angato makataamani ’angato.  lo mokelani ziki ta’italetalekae,’inikookonolrao molrahalre loalaala kone ta katoalraalrai madho. madhalamelrao iki aleveeni ’angato toloholrae, ona ta ’ape’apece iki vekenelre takalrolronga li’ange omi’a dhona ta lidha’a ciyahe. lo kalalrapa’ae, otongatongo kalalrapa’ae omale analo lalalri, kilriilriho’olrao mahadhaolongalrao ’omalemalenge.

ona’i dha’anenai lrikodho valevalevalae, kinakaiconganae ka solate, omi’a dhona aolrolai lo ’ipini. olriho’o to’ahaki li’angeni valevale iki tapaka’analeve ’angato iedhenge analo titina tahokoko, poa tota’ailoko pa’iniyacehae, mani tokahadhoho iki dhona ta’iloko.

mataka’aa’ae ’ina tahokoko solate, omikine ta kaamemelre’e ovale, ta   kakookolai okoko, kasolovoko votolro’o, ikine ta kasii’i ngodhoi, sina kataadhi’ingai tevelengae, ’anoolake’e ovili laalakeni ’ina titina tahokoko, moa nga’anga’atoe ’ikanekane ’osahiyo. lo mavahe’engai ’ina titina tahokoko, mani toloholrae cengele ta kapaikine vila’ani ’inisalrikolriko

onalo kasisa’i tahokoko, ’osahiyo masalaalalra’a.

天空是本變化多端的書。家後面的大片竹林，更是一本神奇的書，像童話的夢幻世界。童年是一本讀不完的書，有無盡的愛，有手足溫情，有遼闊蔚藍的天空，有神秘難忘的竹林，有靈巧可愛的小雞兒，我將永遠讀著它。