朗聲四起

Anu caay kapadang nira ungay kiya baki, a maanen a kapah nira wina nu ungay saw? Kana caay pipadang kira baki tiya ungayan, mimaan a ira ku sasiwasiw ni baki, a caay kangeru’ a dademak tangasa i da’uc?

I ayaw ira kiya ma’ulahay a mipadang a babakiyan, tiya cacay a remiad milapac i umah, tu nika herek a mawmah, araw seday sa kira urad a misateratera, sakalamkam satu cira a midihing i sasa nu kilang, mitala tu nikasaterep nu urad, i nipitala tiya nikasaterup, araw pihaceng ku nikabaesing caay kasaterep, i matini ira kiya cacay a ungay a pabuduy i ci bakian, patayra han i luma’ nu heni, a pakaen ci baki.

Tuya kemaensa i taheka, araw matengil niya matu’asay ku nipi’ang’ang nira wina niya ungay, tuna mahaen patahekal han nira ku sapaeyu, pakaen tiya wina nu ungay, sulinay araw kapah satu kira wina. Salipahak sa kira wawa nu ungay, i matini pabeli han kira babakian tuya micidekay a sasiwasiw, pateli han ku cacayay a belac i tiya sasiwasiwan. Sulinay siwasiw sahen, araw mabuwah kira belac, tuna mahaen caay tu kalihalaw kira baki tu saka ’urip tangasa i da’uc.

Ira ungay a tiya babakian, u kapahay ku balucu’ atu halipadangay tu i cimacimaan, sisa malemed ku heni a malecabay.

Sisa ina kungku tu “ ungay atu matu’asay ” ira ku kahemekan atu daduduan nu mita, atu mitesekay i balucu’ nu Pangcah. I niyaru’ay a kapah anu makamelaw tu mitamurungay tu kasuy atu baeketay a niawit satu, sakalamkam sa a mipadang a mitamurung , a midimata’. Anu sinikaala tu ni’adup, i lalan nu sakataluma’ anu makamelaw tu matu’asay, caay kanca pabatis tu tangal nu ni’adup i matu’asay, mahaen ku nipatudung tu tu’as.

Caay pilunguc tu ma:an, u balucu’ a cacay ku sapabatis atu lipahak nu balucu’ tu sakay tu’as nu niyaru’. Sisa mapapadang, masasuini i niyaru’, u tesektu nu serangawan nu mita, mahaenay a kakawaw, u salipahakay atu salemeday a ’urip. Sisa caay kaw a’adupen a cacay ku mabana’ay tu matiniay a wayway , ita u tamdaw a mikikapah kiyari tu sapipadangaw tu cimacimaan i tini i pa’uripan.