朗聲四起

I aayaw nu pilisinan nu Pangcah tiya labi’i, pacici sa ci ina a papihakulung i takuwanan, a tayra i pusung a milisin. Tu cila a dabak midakaw tu silamalay a tayra, tu cila nu kalahukan tangasatu i luma’ ni bayi. Hakulung han ni ina kaku a tayra i talu’an, sulinay sa rarimuwangsa ku laluma’an a makakungku. Herek sa, tengtengen ni ina kaku a tayra i talu’an a misarakarakat. Pakungku tu ci ina tu demak nu lisin hananay, tuwa tangsal sa a pasubana’ tu keru nu pilisinan, maanen a makakitin, maanen ku tireng a mingiwangiw atu lawat nu kuku satu..., sulinay awaawaay i tangal nu maku.

I aayaw nu talu’an aluman ku minanamay nu limucedan a misakeru, tangasa sa kami i tila papikihatiyaen ni ina kaku a misakeru, naayan nu maku. Araw pihaceng ku debit ni ina tu nika caay pitengil nu maku, araw macacihi kami. Suwal han naku ci ina, “ Kiya pacici tu caayay ka’ulahanay a demak ”. Paca’ub satu ci ina: caay kaw ni pacici nu maku, u sikining nu misu kina demak satu. U tapang a demak nu Pangcah kini, pasun ka tangasaan tu ku mihecaan nu misu, sisa a maanen a minaway saw? Suwal han naku, “ Caay kay tini kaku a subucen, ” madebit tu ci ina a semuwal, “ Cima kisu saw? Na makacuwaay kisu? satu ” pacul han naku kira miliyasay a wina a semuwal, “ Kiya pacici i takuwan saw? ”

Tuya sangsangdeb, papitanengen nu bayi kaku tu nisangaan nira a lusid. Suwal satu ci bayi:, “ A palululen nu maku kisu tu tatudung a lusid, sakapah han a milesimet, tangasa i da’uc satu. ” Mapaaw kaku tu nipihadidik a milesimet ni bayi tina lusidan, kiya hadidik saan a milesimet? I pilisinan a cacay a micaluk tina lusidan caay haw? I matini tu kaku a makasimsim tu nasuwalan nu wina-- Cima kisu? Na makacuwaay kisu? sananay a suwal. Tangasa satu i labi’i makakitin a misakeru, ira tatelecan atu kuku saatekak saan, araw matenes sadawmi’ satu, ira balucu’ araw sadihemay saan, salipahak satu. I matinitu a masamata ku balucu’a maniket i tini i aayaw nu talu’an. I matini tu kaku a mabana’ tu rayray nu serangawan nu mita, mahaen ku niket nu Pangcah, taletangic kaku, pate: lac kaku, a miaray kaku tu nipapikihatiya nu wina tu lalikid nu niyaru’ satu.

原本不願意參加阿美族的豐年祭，認為那是被強迫的事，甚至與母親發生爭執。然而，在與外婆互動並聽到她對傳統服飾的珍惜後，開始反思身分與文化。最後在大會舞的氛圍中，感受到族人的團結與文化的深厚意義，體認到豐年祭是阿美族的重要傳統，也豐富了自身的生命，因而感謝母親的堅持。