朗聲四起

kasicuayan, izua za pinaka ti salavan a ’adav nu cemas, ayanga tu si’atian ta cawcau, ’au penili’ ta djuadjuay a ’ipu, sa alang tu tjaramacidjilj a u’aljay kata vavayan a pinarucawcau a malang ta ’ipu, sa djapesi a venalidi a papunasi, a papuvavaki aza inalang a ’ipu a kinacavacavan, katua kinemeneman a vinarungan, kemasitazua katjenasiananga cawcau, sa inika mavavetjekanga nasi nua cawcau, sa palalautanga a maudaudalj.

aicu a kinasizuanan a tinagiljan na cawcau, itua pinili’ na cemas a ’adav, tu papucekelj, sa patagilj a ’emati a seman aljak ta vavayan kata u’aljay tu si’acuvungan ta sinisekaulj, na cemas a sengesengan. ayatua madadutanan a djamu’ niamadju a marecekelj, azua sinipualjak a u’aljay kata vavayan i tua cungal a pinumacan, pakasarekuya a ravac ta sikipakakudanan. saka pita siki ’ecevan ta sikavaljutan, pinarumaljanga i kacauan sinipaljiazuanga sikudan na cawcau sa zinululjanga na masan pazangal a kakeljangan tua sikudan na cawcau.

kame’acanga aza marekaaljak, izua i dudut ta uma’ a karakudakuda, tazua nasedut a kalevelevan ta kadjunangan, sika maculju aravac a cedas na ’adav, ka maisu ta va’u, ayatua masa ljiatekuanga a ’adav, azua sipaysuysu a ’aselu, nu cidingen a paljiavavav secugcug sakamaya ta kalevelevan, ljakua izua za napenakaleva ka ljevavav sa ljeteku a maysuysu, pinaljiavavavanga cemukes a kalevelevan, ’au maitazuanga sa masualapanga pazangazangal a pacugan. ljakua, ayatua ita cungal a pinu macan nu tjematjukutjukun ta ’ipu, aza ’ipu kata tjatjukun secugcug sakamaya ta maca. ka vililjanga, semata ’uluanga maca niamadju, sa masualapanga sikamasanmusalj a pazangazangal a pacugan.

a pa’ulid a sikesan ta vasa ta vurati pakakedri nu kemesa, kumalji nu kemesa ta va’u ta vatan a sikesan, ljakua ka matugaduanga djinumuljan tua lami niamadju, sa kinemenem tu pakaliav a kemesa, sa ’emvad tua va’u sa kesa pitua pariuk, anema keljang tu minselak aza kinsa a va’u, meliav sa kapelju’ a uma’ sa mulavilavi’anga pasa paljing kata ’ezung, ’au tazua matjuka mavilavilad a cawcau, sa izua namacay tazua. sakemasizua meruca’uca’uanga a tjaivilivililj a cawcau tua cengeceng a sikesa.

亙古時代，一位太陽神salavan，塑造一男一女的泥像，從此有了人類。兩位人類結為夫妻，生男育女，生下的兒女眼睛長在膝蓋上，造成生活的許多不便。隨著勤奮工作，糧食越來越多。本來煮芋頭、地瓜時都切片，煮小米時一次煮一粒，當糧食堆積如山時，他們想要煮更多，於是隨手抓起一大把小米放到鍋上煮。哪知這一大把小米竟然膨脹得把整個房子及門窗都塞滿，逃的逃、死的死。

從這次慘痛的經驗中。後代生還者終於學會用適量的小米來煮食。