朗聲四起

ka sicuacuayan, izua a drusa a ’adav i kalevelevan, nu maledep a ita ’adav, mine’ut a kitjaivililj aza maljian a ’adav a ita. avanusika, nekanu ma’adadav kata’ezemezemetj tazua, ika semekez a masasuilja a mine’ut aza rusa a ’adav, tjuruvu a lumamad a na madrasi sa pacay. ’au izua za macidjilj a namacay ta kinadrasian a lumamad a kama, madudu aravac, sa masipana’ tazua, pakelayan a calinga tu pida singucan a va’u, sevaljen a macidjilj a aljak a u’aljay, vaik a pasa kacedas tu venalet ta ’adav. ka pasusangas a vaik, temalem tu ta’apuluan ta tjianes i kasasavan, sa ’ivu ta cemekeljan “ nu me’aca sa vangalj a tjianes, tjara’en a tjuma’ ” aya.

aza maraljak ’adjav ki pacalivatanga tu pida a cavilj, sa me’acanga za aljak a u’aljay. temekulj tuki pidangapulu’ a gaduan, izua ka ita a ’adav, manu secevung ta ’adav i palikulikuz ta ljinavia a uma’, ’au pakirimu a penana’ ta ’adav, ljakua mapana’ a ita maca na ’adav, ’ezetjen ta tailj a lima aza na mapasa’etju a maca, sa djadjasen ta tailj a lima za maraljak, masiduduan a kivada’ “ aku nu pana’en a ’u maca? ” tevelain niamadju “ ayatua maculju sakapacay a tjuruvu a nia lumamad a aljak, avannu nia sipavalet.” aza ’adav pacun tu kinasivarung a kisupacevak nua marealjak, gaugaven sa pusaluy ta pasaliv tiamadju, sa ’ivu “ kemasitucu ki’en a masan ’iljas, nu tjuma’anga mun tjaucikelianga nu sikata’aljan, nu itua malitjuku a ’iljas kapalisiuanga a’en, nu mayatazua tjaramun a pulami. tucu ku pavayai ta kuka kata vusam na va’u, a kuka kinamasane pakeljakeljang

ta milingan(kukuan), aza va’u mavana sipalisi ” aya. kemasizua patagilj a sangasangasan a ’ezemezemetj. ka pasavaik a maraljak, ’ivu uta aza ’adav a mumalj “ kemasitucu nu min’ut a’en i tua vilivililjan a ’adav a ljemita’iljas, uri kemacua’en ta macidjilj a cawcau, tazua sekezuanga a lima ’adav, tu ikamun a makaya keman ta na ’aljeme’em kata ’apedapedang a kakanen,  ika kinvava uta, avan a sikapaulan tua kinacu a cawcau”. ka djemaljun i ’inaljan tiamadju, nadremadrukungananga ramaljeng a kama, ’udrasananga aza u’aljay a aljak. aza sinitalem a tjianes na venangaljanga tu liav. 

sa pasemalav ta sinipazazekatj na ’iljas tua ta’alja’aljan. kemasitazua a sebunung a cawcau situgut a kemasita’iljas a va’u, sa pasusu ta malitjuku na ’iljas a masengeseng kata kemapalisi.

以前有兩個太陽沒有黑夜，許多嬰兒被曬死。一位嬰兒的父親帶了弓箭，帶兒子往東找太陽報仇，出發前種一棵橘樹，對家人說：「等這棵樹結果，我一定會回來。」

他們找到太陽，拿弓射太陽的眼睛，太陽問：「為什麼要射我？」他們回答：「你曬死許多族人的嬰兒。」太陽說：「你們靠我生活從不感激，嬰兒才會被曬死，這是你們招來的禍害！」兩人聽了太陽的話，拿衣服給太陽擦眼睛並道歉。往後，布農族人以月亮圓缺作為耕種與祭祀的依據。