朗聲四起

Ukais bunun maqanciap tu sikackua daing ca diqanin, maupa’i mantan madaing sala ca diqanin, ukais bunun malulu tu nanu pan’ica ca diqanin. maca mataisqang ca diqanin a, mantan masanglav manau’az sala sadu’an.

Maca luhum a, maszang is huluc tu pakavilicun han daza is diqanin, nitu mamaszang ca patas inai, haiza ca madauqlac, madangqac, mabulav ciin mataqdung…. Vaivivaivi sadu’an maupas maiza ca bantac inai tu kavivila mudadan han daza is diqanin. Maca luhum mangki a, maupas tatavis lumaq tu madudung is kaibaqaicas vali.

Maca sadus buan huzanghuzang han daza is diqanin, taqu itun tu cikuin ca iniqumican inita han dalaq nastuti. Maca sadu’an ta ka buan, mingqais mabilaulu mataisqang sala, mingqais mu’haz padusa sadu’an, mingqais makuis sala, mingqais taqdutas luhum nitu usadu’an, qaitu maca buan a, altupat qani’an sanavan qailic iha’an daza is diqanin, maupa’i maca ata ka bunun qabas maca cikaupaka sikukuza ciin cikaupaka sinluc’an nanu sanaciat buan madailaz is nakukuzaun ciin lucan.

Maiza amin ca matan madia sala ka malbibincal sadu’an a bintuqan han daza is diqanin, ukais bunun maqtu masipul tu nanu pia ca bintuqan. Maca macial ca diqanin maca tauna hanin sanavan a mantan manau’az sala ca bintuqan han daza is diqanin tibibincal sadu’an, qaitu maca mincingqalin ca diqanin, ni’in usadu’as bintuqan, niit qancaipun tu mun’ica ka nai tungqabin.

Maca qainudanan a, mingqais maiza mintasal ca qaivalval sadu’an, maca patas is qaivalval a matan manau’az sala sadu’an, maszang amin is haundul ca qaivalval tu na maqtu laqaiban ta munhan diqanin.

沒人知道天有多大，因為它沒有邊界。天上的雲，有白色、紅色、黃色、黑色…。而月形也有圓的、橢圓的及上弦月、下弦月。她偶爾也被雲層擋住。有時很明亮，有時黯淡，但從不停止地照耀。天上的星星，雖綻放光明，但從古至今沒人可以確定其數目；他們都比鄰而居，有的看起來很亮，有的看起來卻黯淡無光。雨後天晴會出現彩虹。彩虹有很多的色彩，以紅色、黃色、青色是較清晰地呈現。色彩彎曲成橋的形狀，好像可以通往天上。