朗聲四起

Maca malqaqanup a sinkukuza, nanu iciat Bunun siduq minaqabas matan kasauqbungun a sin’iqumic, sintupadau tu, pintas’a is’ang is ail’acangan mapaqusil ciin pintamasaz.

Maca qanupan a dalaq ciat minungaus mundiip qanup a bunun ca u’siza’as qanupan a dalaq aiza. Amintu maca paqusilunin ca qanupan a dalaq a nani’in maqtu qalmangun munda qanup, asatu pintuza’ang is taima qanupan a dalaq natudipin maqtu mundiip qanup.

Minaqabas maca maiza ca qainupan a mama’az a asatu mu’haz pasikdus bungu kahung ciin vaqa, maca duma’in a asatu aminun paqusil is maitac’an ciin kakaviaz, maupa’i sintupadautu ciat qanitu is madadaingazang qabas ca makahan tasaq macaiv is maupati macial a bahi, amin tu maca cikaupa munludun qanup a nasaipukus qanitu is madadaingaz. Maca paqusil is mama’az a asa amin tu mapiszang paqusil, sintupa tu manahip patuqumic. Maqtu minahan maupati a sinkukuza taqus maikikingna tu makua ca macial han malqaqanup a sinkuzakuza.

Minvaivin ca sin’iqumic laupata, maca munludun qanup a, tis’uninis namaqtu isbaliv han kakaunan qaising pahuvai’is cui, anaqat daqdaqanin haiza ca bunun munluludun qanup, ukain’is matusamu palkaciat malqaqanup a sinkukuza, tis’uni minmaupinti ca bunun haip a, mataqdutin ca Sihu tu ni’in maqtu qalmang munludun qanup, anaqat mu’hazin ca bunun kamiming munludun qanup laupata. Amin tu altupat maiza ca qainupan a mama’az ni’in amin qalmang macaiv paqusil is maitac’an ciin kakaviaz.

狩獵是布農族的文化，對布農族人有穩固社會組織、共享及訓練等意義。獵場所有權之確立，是由最先發現者來決定。其他人嚴禁進入，除非徵得同意。族人所獵之物會分享給親友，是歡悅、互相祝福的表現，只留下動物的頭骨、皮、角為紀念。狩獵是訓練讓年輕人了解狩獵各項文化；但現代人將狩獵成為賺錢的方法，不再遵守傳統禁忌，分享的意義也不存在。狩獵是學習與大自然相處，進而將此文化傳授下一代，而得以保存，沒有自私和利益。