朗聲四起

Ira ko cecay a romi’ad, romakat kako i lalan, manengneng ko cecay o fafakien to a tamdaw, cikeloh han nira koya malitangay to a fofo, itiya mapoli a ti’enang sato i sera koya fofo, nengneng han awa ko sowal noya micikelohay a fafakien to raraw nira, tatapal sa cowa pisikor a sapalowadaw toya mapolinay a fofo.

O kateliian no mako i, oya ’alomanay masakapotay a mitiliday, paka’araway to kapolin noya fofo alamitaelielif cangra a milaliw, Awaay ko sini’adaay a faloco’ nangra. O roma a tamdaw i, satalimaamaan sa a minengneng, pakopifalahan sanay to lakaw ko pinengneng nangra toya mapolinay a fofo, awaa:wa to ko sida’itay no faloco’ nangra, nanoya laliw saan to  toya fofo.

Oya sato malitenay a fofo , sakalomowadaw cowa pakafilo to tireng nira a tomireng, awaay ko ’icel a lomowad. Itiya sadak sa ko cecay fa’inayan a mitiliday mirawed a palowad toya fofo, tihtihen nira ko tahefod i kafel noya fofo, licayen ho nira, “ Nga’ayay kiso ha fofo ”? paca’of han noya fofo, “ Nga’ayay to kako, ahowiday kiso ! ” han noya fofo a paca’of. “ Aka piahowid kiso i takowanan! ” han noya mitiliday maherek a somowal miliyas to.

Se:mer sanay ko faloco’ ako toya manengnengay, pakayni tonini a demak, ma’orip kita itini tona tahaf no hekal i, iraay ko cisida’itay ko faloco’ no tamdadamdaw, saka o piharaterateng no mako i, oya cecay mitiliday a fa’inayan, o tatodongen no mita ko pinangan nira; oya sa a faki cikelohen nira koya malitengay to a fofo, awaay ko sini’adaay nira a faloco’, o kakapili’an ko kahatira ko pinangan no tamdaw.

O tamdaw hananay i, mafokil a madadama, o maan ko epoc a malatamdaw. ’Aloman ko kinafalah sanay to ’orip a mipa’orip to tao a tamdaw, o tadama:kapahay ko hatiniay a waywayan. Ona manengnengay no mako a demak anini i, semer sa ko faloco’ no mako, doedoen no mako ko pinangan noya mitiliday a fa’inayan.

Ano malapainiini kita to mimiming to olah anca o sida’itay no faloco’ i, makapah a maka:pah kona hekal no mita.

目睹一位中年男子推倒老奶奶卻不幫忙，許多國小生也漠視不理，讓作者感到憤怒與失望。幸好，一位男同學上前扶起老奶奶，展現出善良與同理心，讓作者深受感動。感嘆社會需要更多這樣樂於助人的人，並呼籲大家從小事做起，發揚愛與關懷，讓世界變得更美好。