朗聲四起

Yo kaemang ho kako, iraay ko sanokalangay ako a paliding. O sapinanam a romakat kora paliding. Mafa:na’ to a romakat i, o toloay to ko karireng no paliding ako. Ta’angay to kako toya o kahofocan ako a romi’ad i, mi’acaay ko wama ako to tingsa. O citiliday to koetimay a cengel. Wa:ho sa kako to nanohemek a milayap tora tingsa. O tingsa hananay i, o ’icel no tamdaw ko sapiparakat. O oo’ ko sapicokih nga, marirengay ko karireng. Ano talacowacowa to a misalama i, sitingsa. Cowa to papayci a mikalic to paso. Nga’ay haca miyatayat to tireng. O roma sa to, ano mimaamaan to i, caloway to a talacowacowa. Saka, tada mao:lah kako toya tingsa.

Maharateng no mako koya demak itiya ho. Toya pihatatanam ako a sitingsa i, patado sa ko wama a milepet to kaikor no tingsa. Sowal sa, “Lepeten ko hantol no tingsa, sa’icelen a micokih ko taripa’an.” Somowal haca, “Aka pasayra i kaeno a minengneng, nengnengen ko ka’ayaw.” saan. Hatira, sonisoni romakat, sonisoni tomireng, kinapinapi:na ko pilingsiw. Hala:fin to nga, sawad han to no wama ko kamay nira a milepet. Mafana’ to kako mionting to tingsa i, nga’ay sa to ko pitatingsa no mako. Maraay a mara:ay to ko rakat no mako. Itiya sa to, hemek sa ko faloco’ ako. Toyanan to i, maharateng ako ko kafokil ho ako a mi’ikong to tingsa, mafokil haca a maepod, mansa mapoling kako.

“Nga’ayay to!” sa ko sowal no wama ako. Milingsiw to tingsa, nga’ayay to a mapolin. Kaikor to i, ma:fana’ay to a sitingsa. Soelinay to kona sowal no wama.

Mararid matatahidahidang kami misalama. Sitingsa sa i lalan pacikay to tingsa, anca cowa pilepet to hantol no tingsa. O pitatawa niyam ko matengilay i lalan. Nengneng han ko lawalawacan no lalan i, makapahay, sekay han nira koya marawraway a faloco’ ako, sanga’ay sa! Nanay terep saan itini kona tatokian o tadakahemekan no faloco’.

Maolahay kako tona tingsa ako. Si Celong hananay no mako a pangangan. Maharateng ho ako koya pisasatingsa ako iti:ya ho i, hemek sa ko faloco’ ako, cowa ko mamatawal ako kona demak. Tahini tona pikimad a mitilid, sakasitingsaaw sa kako.

從學走路到學騎腳踏車的過程。小時候，從螃蟹車學走路，後來換成三輪車，直到某年生日，爸爸送了他一台紫色腳踏車。初學騎腳踏車時，爸爸扶著後座，反覆練習後，終於掌握了平衡，但也因為不會轉彎而摔倒。爸爸告訴他，學騎車不要怕摔，跌倒是學習的一部分。隨著時間推移和朋友競速、展示技巧，並在騎車時感受到自由與快樂。對腳踏車的喜愛，並且透過回憶，強調學習過程中不怕失敗、勇於挑戰的重要性。