朗聲四起

Han cata dalaq nastu ti miqumic, sadu cata madia’ vevi dalaq vevi sidqo vevivevi miniqumic tu bunun. Ihan Taivang ti sadu cata heza’ bunun, Qalavang, Bantalang, Tanaul, Saisia, Isvatan, Paivang, Lukai, Pu’iuma, Ta’u, Kavalan, Taluku’, Seteq, hezang Put, Tolu, Ngaingai. mintun amin cata sadu Amulika’, dangqacqulbu cin bununtaqdung.

Ihan cata acang tastuqani’an tu iniqumican, na pasadu cata madadengaz tu qudasnanaz qudasno’az, cin pantama’un pantina’un, pasadu ki talmindu’ tu masitoqas masinoba’, pasadu tok’i’ita tu uvava’az, cin huboqang tu uvaztikic.

Maca malkacia bunun na, asa tu maszang malka’anak’anak, ni cata bunun asa qecbacun bunun, ni amin cata asa samatola’an ni bunun.

Maca ihan kaku’ asa tu maqasmav masipul pasnava’, ni tu maletaz, katu pa’a’anak, ni tu sisili ki madikla’ tu sinhuzanghuzang. Picihalun na sinbingkiu’, na manahip pa madadengaz , latuza tan’a icia madadengaz tu qalinga, latuza icia masitoqas tu sinkalun, madedaz sepuk masinoba’, mopata imita’ bunun na malkacia bunun tu iniqumican.

Ma’ata bunun na heza pali’uni samu tu iniqumican. Mopata tu, ma’aq qa uva’az za ni tu maqtu samatola’ madadengaz, ni tu maqtu toqna ki madadengaz, ni tu maqtu saqalmang ngi madadengaz. Samu kitnus maca heza’ a bunun, samu pusaksak, masamu qalmang tangqe’iu siza’ icia duma bunun tu qemangsut sincucuaz, masamu maqecbac ci mintinalu, masamu macalaqet ti mapiqa cin mateqav tu bunun, masamu maqenan matola matemang tu bunun cin udananin tatini’ tu bunun.

Maca na ma’un ni qanusil la, muaz ma’un ni icia tamatina sinpaqusil tu titi’, ni tu maqapu, Maca heza’ tentungu ka cia ki tentungu ka pungosun paka’un, dipi mina’unin na tentungu ka natudipin na tastulumaq mulalaung ma’un. Masamu pisozang ngi tentungu, opa na maca pisoqzangun na tentungu ka, napik’aminun qanitu’ ma’un na koko’un han lumaq nai ta, pangqa asa cata bunun tu masazangsang masolvaz malkacia bunun, natuqumicun tamadiqanin.

我們不願被人欺壓瞧不起，對人要像對自己一樣。前輩教我們，老者憐愛小孩、壯年努力工作、小孩聽老者的勸戒。在學校認真不懶惰、打架。在家裡，聽從父母的話。布農族待人禁忌，小孩不可輕視遺棄長輩。禁在人面前放屁、說謊話或偷東西。禁惡待孤兒、輕蔑跛腳和眼瞎、禁嘲諷傻瓜和寡婦。

吃肉由父母分配享用。家有客人用餐，客人先吃完，才去吃。禁止客人餓肚子，讓客人餓肚子，鬼就把家中東西吃光，我們要慷慨待人。