朗聲四起

O palakaw hananay i, o misanga’an malo pikiloma’an no foting, o nika tadamaan ko taneng ato fenek no to’as no mita o Pangcah malopifotingan konini. Itini i kaetip no Fata’an a niyaro’, ci Laso’ay han no mato’asay a pangangan, saheto o rengorengosan poener ko lengaw, nika adihay ko nanom itira, saka o senasena’an a manengneng iti:ya ho, awaay ko misikolay a pamatang. Nikaorira adihay ko masamaamaanay a foting itira mikiloma’, ira ko lilas, o hara, o toda, o komo, o kafos ato rarokoh itira. Nika o tata’akay a foting komaen to mamangay a foting, saka safaloco’ sato ko mato’asay, samaanen a paloma’ tonini a foting ta ma’orip a maemin saan.

O roma sato, misafaloco’ to samaanen ta mangaay itini i taliyok malo pikiloma’an nonini a masamaamaanay a foting saan cangra. Orasaka, doedo han nangra ko dahetal no ’alo a mikarkar misanga’ to mimingay a fanaw, parariting han to nanom no ’alo ta micomod ko nanom, masamaanay a foting i lalinik no fanaw awaay to ko katalawan nangra itira a ma’orip.

O sowal ni Lalan painiay to sowal i, toloen ko katatingroh ko pisanga’ i lalinik no fanaw ko palakaw saan. Pakalaeno telien ko tata’akay dodoh no ’aol, maloloma’ no tata’akay a foting, i kalaeno no dohdoh a dita’ ira ko komo ato toda; i sakatosa a tingroh o ma’icangay ca’ang no lalidec, o malo no ’afar ato kafos itira; i sakatolo a tingroh pasaksaken to ca’ang no ’aol maloloma’ no manmaanan a foting ato nampokoy itira, hay mapa’orip ko mimingay caay ka kaen no tata’akay a foting, fangcal to ko pikiloma’an no manmaanan a foting ato ’afar, caay to pitolas a ciwawa.