朗聲四起

Lmiqu dwiyaq bukuy alang Paran hiya, niqan kingal paru btunux, “ pusu qhuni ” sundha haya. Dungus na pa “ pusu wamin qhuni ” enca. kiya kndadax hini kana ka sediq ta mi kana kndusan dxral hini.

Cbiyaw ita sediq enca wa nanaq dha tnswayi, uka naq brahan ka saw nii, iyux qniqan mi prana lmutuc dha, maku musa priyux qtaan dqras na ka swayi na, yuxun na smruwa thuy mstrung qbsuran na.

Cbiyaw sediq enca, clokah bay kndusan dha ciida, nasi kmkan camac daw, blbil kingal ubal camac daw, kiya niqan uqun dha da; ini kiicu ita sediq ka camac uri; ana brunguy mi tahuc qhuni qnpah nanaq kana, ini duuy bawa sediq; midaw kingal dmux macu daw, kiya knbaka uqun tnsapah da.

Hawan bay! ini dha spruun ka eoda nii, txal enca, wada ddaan pskluwi laqi mqpudi maku wada asi huqil ka brunguy dsa. mi niqan ka sediq mshuur, wada na paqun kana ka camac da mi kndadax ha daw miicu ita sediq ka camac dsa.

Kiya ka laqi embsrux, wada na asi dawi kana ka macu, wada asi

ptriyux puruc kana ka macu mi wada asi skaya kana da.

Kndadax hiya dow, nasi sow kmkan camac ka sediq dow, asi ka muriq bay mhraw camac, musa ta naq mapa ppanun ta, mi kiya saya dow miyah thuy ita mluk uqun sediq ka puruc dsa.

Kiya iyux sow pkdira ita sediq ka utux, pusa dha hidaw mssriyux cnbu dxral.

Wada naq asi madas laqi nanaq ka tama musa cmbu hidaw, nuda bsiyaq diyax daw, mdakil ka nadas na laqi da, mhiti daw kiya laqi nii ka wada ptuting kingal hidaw da. kiya ka wada triyux idas qtaan ta saya.

Qyuxun na paru quyux dungan ka utux nii, wada asi ddaan mapa paru qsiya kana ka alang, asi ka dha ddaan qmada ucilung ka uka waya sediq daw, kiya ka thuway mrih ka paru qsiya.

Pneyyah sisil dungan ka utux dungan, miyah tmsa sediq waya enca, sow laqi snaw asi ka paru pahung smipaq pais mi mkla maduk, kiya ka malu matas dqras kduruk mi bkluy dha. Sow laqi qridil pa asi ka mkla tminun,tminun lukus mi qmlahang sapah, kiya ka malu matas dqras mi kduruk dha uri. Asi ka sow kiya, mhuqil daw malu dha ddaun qmangaw ka hakaw utux mi mthuy utux rudan dha, sow nii enca kiya ka sediq balay.

本文介紹Sediq許多故事。人類始祖、小米變成麻雀與人類爭食、兩個太陽的故事、大洪水、神鳥的故事...等。