朗聲四起

“kemay kanta inupatraranan pallu dra muburek ta i punapunan. an adri ta driya temallam muallaalla muwadrangi. nanta ikababaaw i, uniyan dra tratrepatrepa.” kema marengay a trau. na muallaalla muwadrangi i, pakasasadru drata iyanau isaseer aw drata kakalladraman. an maranger ta muallaalla muwadrangi i, sadru a aukayan kadri Taiwan. adri i, muka ta dra druma dra kanatal. an kadru ta i Taiwan muallaalla muwadrangi i, ta pakurenanganay drata wanger muka muallaalla muwadrangiya.

na maidrang inaba kurenang kana lepunan muisatr dra yuranbas mukasakasa muka muallaalla muwadrangiya. sadru a marekamenimeni a drekall kadri Taiwan. maranger ta muka kadrunu kema ta i, tu pillangaw ta kana mitrepa benatibati. marayas kemedrekedreng dra trau aw, sadru tu kinalladraman. tu paseketay ta benabati dratu pauwayan. saigu paresimusimuk dra labang. saeru ta, kemesis ta, semenay ta. abalu ta lla drata ulepan. an mauka ta muallaalla muwadrangiya i, inaba an millang ta. maruwa ta driya madradrayar mapullapullang. aeman na kemasu dra sadru dra manay driya.

muka ta muallaalla muwadrangiya dra salaw inaba dra kanatal. tu pinaraganan na ruma na bulletrenganan i, tu bilinaw. a pananauwan dratu temuwamuwan. aw na kemay isuwasuwa driya na trau. tu sinasaleman na aputr, na tralun, na kawi i, babulayan. an kemakawang ta mudrangidrangi i, kurenang ta inaba ta wanger aw salikesik ta dradrek.

na sagar muallaalla muwadrangi na trau i, kurengaway driya dremulun dra paisu dratu aukayan kana kanatal aw masikasik lla. adri lla mabangabang dratu puwatrimaan dra ritus, dra aekanan, dra kaadruwan. saima tu pinadangan aw apeap tu kawang. salikesik tu dradrek aw maysemangalan muka muallaalla muwadrangiya. tu ninauwan na bulay i, tu sasingay tu tilillay. an ullaya tu kinasagaran aw madulu tu trima kana manay driya i, tu trimaay. tu pakasemamangal dra nirumaenan.

an marayas ta muallaalla muwadrangi i, kamawan ta dra temakakesi. an sadru ta nillimawan i, temullutellu drata kinalladraman ta kinasaiguwan.

旅行使人增加見聞，開闊視野。若想去旅行，國內有許多景點可去，或出國旅遊。年長者搭遊覽車跟團去旅遊，國內旅遊很方便，最好有伴同行可互相照應。到生活品質高的國家旅遊，四周環境整理優美，讓旅遊者心曠神怡精神佳。帶著健康的身體及愉快的心情去旅行，可留下好的鏡頭或紀錄有趣或難忘之事。

常去旅行也是受教育，正是「讀萬卷書，不如行萬里路。」