朗聲四起

Masofoc ko tamdaw nanitiyad no ina^ tayni tona hekal haw i, o tangic ko sa’ayaway, nawhani matiya o mafana’ay to ao mamaroray ko ‘orip no no mako itini i hekal saanay. Itiya yo mipatopa^ ko ising to saripa’ noya kaemangay a wawa^ i tipelok a misatapang a malafinawlan nonini a hekal. Orasaka, yo pa’awas kita to romi’ami’ad, ya ceca:cecay a naripa’an no mita haw i, matomatiliday i ‘orip. Caay to ko mamasi:sit. O mamasamaan ko ‘orip i ikor, dengan o tireng ko sitatodongay a mipili’ to malolalan no ‘orip no niyah.

Caay ka o rahodayay ko nika’orip itini i hekal, adihay ko masamaamaanay a fangafang, ano roray to, ano pades to, caay ko mamali:yas no mita. Matiya o riyar a caay ka awa^ ko fali^. Ano malitemoh ita ko lodis i ‘orip haw i, aka ka talaw a miso’ayaw. Awaay ko lonok saanay a malatadamaanay a kakitaan. Ano caay ho^ pisa’icel kita haw i, mimaan a ma’inal to nikacakat no ‘orip no tao. Orasaka matapal to no mita ko masamaamaanay haratneg no tamdaw. O tararikoray ko ‘orip a tamdaw haw i, mafana’ cangra a pa’atingid, adihay ko ngaliwngiw. Caay ho^ pakanina’ cingra to masamaamaanay a ‘orip, o mamisa’icel cangra a misi’ayaw to masamaamaanay a roray ato pades ta mafana’ cangra to ‘orip hananay.

Tinako^ to cecay mafodihay a tamdaw, o tadamanay a hakasi^ no Padaka^ ci Helen Keller. Yo mamang ho^, 19 ho^ a folad na mahofoc i, cilalisan cingra, tata:’ak ko adada^. Narikoran noya adada^ i, mafodih, mado’eng cingra. Caay to ka nga’ay a somowal, nikaorira caay ka sawi^ ko faloco’ ningra, sa’i:cel sa cingra a minanam to maamaan. Miso’ayaw cingra to hatiraay a ‘orip haw i, wa:tah ko pades ningra a pa’awas to kahacecay no romi’ad. Kinapinapi:na^ to cingra pakalitemoh to roray ato salifet i ‘orip, nikaorira caay ka tararikor ko faloco’ ningra, re:pet han ningra koya kacifaloco’an ningra a ma’orip. Caay ka ngaliwngiw, caay ka tararikor, caay pa’atingid, tanga:sa i kalahecian noya kacifaloco’an ningra a demak. Onini a tinako^, tada o fangca:lay a sapikitemel to faloco’ no mita.

Kita sato to no mita, da da da! Sa’icelen codahen ita ko faloco’ a miso’ayaw toya kacifaloco’an no mita, aka ka talaw, aka ka tararikor. Kalimelaaw ita ko romi’ad. Nanay malo dado^doen no rarikorikor ko fangcalay a naripa’an no mita.

凡走過必留下痕跡，是光鮮、黯淡，取決於己。人生道路坎坷難行，問題、困難、挫折、失敗考驗著我們。只有面對問題、解決問題的人，才能創造成功。海倫凱勒19個月大時因一場大病讓她眼不能看、耳不能聽、口不能說，但她沒有就此放棄，是我們學習的榜樣。

懷抱理想向前走，面對人生，沒有逃避退縮的權利，要如何讓它發光發熱，就從現在做起。既然來到這個世界，就不要空手而回，讓我們留下自己的腳印，讓別人看到我們走過的足跡。