朗聲四起

Tosa^ ko kamay no tamdaw, awaay ko caayay ka filo^ nangra a midemak. Cecay a kamay lima ko tarodo’, nika caay ka sasiwatid koya lalimaay a tarodo’, mapapadapadang madadamadama^ saka, tadama:an sa ko ‘icel nangra. Yo cecay a romi’ad, ya lalimaay a tarodo’, malaliyang cangra, “ Cima ko sakakaay ita? ” saan, saka tahidang han nangra ci Marang singsi^ o mamisawkit, ao cima^ ko tada kalimelaan nangra a saan.

Sa’ayaway, sowal sa koya salitataang, sowal sa, “ Mapangangan kako to salitataang, saka kako ko sakakaay. Nengnengen, ano palata’ang kita to cima:an a tamdaw i, saheto o salitata’ang ko sapahapinang. Orasaka, kako ko tada kalimelaan.”saan.

Do^do^ sa koya satoro’ a tarodo’ a somowal, “ Caay ka matira, nengnengen! Ano mitoro’ kita to sakatalacowa^, ano eca^, malalifet to ma:an aca^ i, saheto o kako ko pido^doan, saka kako ko sakakaay, kako ko kakalimelaan.” saan.

Oya i terongay a tarodo’, sowal sa, “ Aka kalaliyaliyang a mapolong,

sadaken ita ko tarodo’ a pasasotiri’. Nengnengen! Cima^ ko satakaraway i, mahapinang o yaan ko sakakaay no mita! ” saan.

Oya to awaay ko ngangan a tarodo’ i, caayay ka pidah ko faloco’, sowal sa, “Kako ko tadakalimelaan! Ano saan aca^ kamo, nawiro patatamos sa to mararamoday i, itini i takowan a mipatakec, orasaka aka to kalaliyang, kako koya kakalimelaan.” saan.

Saiko:ray to, o salikiki’ to ko somowalay, sowal sa, “ Ano mimimiming ko tatireng ako i salaloma’ no mita a lalima^ i, nika ano matatelek kita to i cimacimaan a tamdaw i, caay ka eca^ misadak to tatirengan ako a makakawit, o todong to pihayda no faloco’, saka kako koya tada kalimelaan! ” saan.

Maherek to cangra a malaliyaliyang, keton hanto ni Marang singsi^ a misawkit, sowal sa cingra, “ Kasasimetmet kamo o lalimaay! ” han nira. Itiya to caira a mafana’, o malacecayay caira a lalima^. Caay ko mamanga’ay caira a malaliyas, edeng o kalacecay a masasidama^ ta manga’ay a mapalowad ko ‘icel nangra. Orasaka, ya lalimaay a tarodo’, o kakalimelaan a maemin, nika caay kalecad ko paytemek no tayal nangra.

人有雙手，手有五指，五指並用，合作無間。五個指頭爭論誰是老大？大家一番爭論後，裁判們做出一致的決定，要五個手指握拳，這時才明白彼此的依存性，缺一不可，唯有相互合作才能凝聚力量，發揮最大功能，所以五指同等重要，各司其職。