朗聲四起

kurelrang kantu ma’a’idangan mukuwa kikaduwa i Taipei i Sunay. muruma’ nu pavilung alra adi maruwa sawariyan. maranger muvilin i dekalr i Sunay, adi muwai i temamataw.

meredek lra kana katalaulepan a derun mu, tu kiyumalray i temamataw, “ama, sasede’ mi da tatelraw i takesiyan harem. karuwa ku muruma’ i dekalr? sare’ed ku kani mulri” kema di ai lra kema i temamataw.

muicas kana mingadan da Puyumahaw na kissiya muruma’ i Valangaw. salaw semangal i Sunay. semenasenay di seme’ese’er i pacaran. mareanger kantu tinuru i temamataw “amana pakavangavang kani temu, pulralrangi lra kikarun. talrami menadanadam temarakasavakan kimadayar kani temu.” kema.

meredek i ruma’ mu, pavekas mukuwa kemapuca kani temuwantaw. “mumu, muruma’ ku lra!” kema. dadaway kana pinalupuk i temuwantaw mu, tu pilralrangaw i Sunay mukuwa kilrapuya di kilavilruwa. tu panadamaw maya’ da vulay di penauwa na vira’. salaw pangecengec menadanadam i Sunay. “man nu siyasingay na lrapuy? man nu pasirepay ku rinarengay?” kema kiyumalr i temuwantaw. “mumu, nangku nadanadaman marengay nu kadu ku i Taipei mu!” kema di salaw sadeku nu kinger i temuwamtaw.

pungaway diya mena’u da demadaway da pinalupuk i Sunay. semavesav da lrapuy, palimi’ da lavilru; tumulre’ay da tatilu’; pulralrang di kurelrang demaway. nu haremaremay mu kiyumalr; nu haremaremay mu pana’u datu dinawayan.

menadanaman diya kana senay, nu ulra tu kina’ulidan mu, payas kiyumalr kani temuwantaw, di tu vavalrayay.

parekaduwa vulan tu kikaduwan i dekalr. mukuwa kirepana’uwa da rinuma’enan, maya’a da ngidangidayan; di mukuwa kikulanga i ’uma’uma; kinger da vativatiyan.

sadu lra tu kinadalraman da kakuwayanan i dekalr. tu semangalan tu paatedanay tu sinasing kani temamataw. 

unay住台北，過年才回鄉時總想多留幾天。回台東時，她爸爸叮嚀：「回去不要讓祖母操煩，要做家事及學族語。」到家，祖母帶Sunay去採月桃葉和假酸漿葉。祖母問Sunay：「你為何要拍照月桃葉和錄音呢？」Sunay說：「練習族語用的。」祖母很欣慰。Sunay一邊學做糕也一邊紀錄她問的問題，祖孫倆邊做邊唱歌，Sunay學得很快樂。Sunay住了半個月，期間去拜房親戚、交朋友、採野菜、餵雞、聽故事，學到很多部落文化，她將記下的資料每天傳給父母，分享她的快樂。