朗聲四起

adiyu diya tu i kinuretan da kairayan a kakuwayanan na silung mu, mau na adi maruwa dimikes na adi mucacalun na cau, di pukasa kana vavayan adi maruwa simihiw pakiwalay, aymu ini na kakuwayanan da sasilungan nu muwaarak ta mu, mawmau i Ulivelivek adi madiadi pulrepus.   

kana hareman lra tu vasukaw lra na Tamalrakaw misasilungan lra nu muwaarak, mau na adi kamaresanan tu pauwayanan awlra!

kanini na vativatiyan na silung mu, ulra a ma’idangan i Ulivelivek i Senayan tu ngadan, venavalray da “a awac diya na cau mu, salaw semaliped datu sayhuwan datu ikakerevat kema. aymu nu madalram lra na cau mu, maulra tu itatulusan da cau diya kema.

ulra a saya ’ami, kadu a mingadan kani Salrevaw kerevat di halamham. nu kurelrang diya mangayawa , mau intaw na ’ilrepat kiya’ulu. ulra parasan kemay i calun penalisi, karekayakayan muricung i apuapuy. ini i Salrevaw mu, adi mianger semaliped kantu sayhuwan di mahelr lra da kipuwaycasan awlra, tu adasaw nantu lipad di’ “ po! po! ” kema munkunkun, marepali’ac. lra nadu, madalram lra tu ikahelran! a cau mu, payas kipulihu lra ngai kani rahan da “ mau nanta ma’inay kanini na ’ami ” kema di kemay kanidu lra demaway lra silung, di nu ka’amiyan muwarak pare’uninan semasahar na kemay calun na ma’inayan, marevulavulas semilung. na kerevat mu, maruwa paliyus, tu paca’ca’ay puicas da tu ngadan. ”

a silung mu dinaway da kawi, tinu’tu’ da cinaucau da mudingan. i likudan kana vanin mu midadikesan, tinilu’an da duwaya a tawlriyulr. na tawlriyulr mu, tu mulemuledaw tumuketuk karuwa da sapasa tu ikatatelraw, pinu’utilran ventevet i paduk, karuwa lruwaca tingting tu ikaaludun. nu semasilung mu, tu pakalretunaw na tawlriyulr kana vanin, na sayhu semilung mu “ kelang! kelang! ” kema tamuni nu maruni.

ini na kakuwayanan da sasilungan nu muwaarak mu, kana muvalivalis lra da kakuwayanan harem mu, tu valisaw lra kakuwayanan kana pakituvangsar da valalisan di vangsaran. natu lra pakakerevat datu pinidadekan na ma’inayan kema tu pauwayan.

早期未出草者及女子禁觸盾牌。初鹿部落仍保留盾舞習俗，泰安部落也已恢復。族人對於能力展現很低調，被動發現後，才接受稱讚。一名叫Salrevaw的人，出草回來迫不及待想被讚揚，便抬起板凳跳喊「破…破」聲。見他急欲被人讚揚，祭司才宣布他是英雄。

盾牌木製，刻有人頭及綁上鈴鐺，鈴鐺以鐵板打製而成，長二十公分，重五公斤，能發出「嘎浪」響聲。成年禮跳盾舞是考驗體能的習俗，受禮者接受盾舞訓練，親友給予喝采。盾牌是重要的文化。