朗聲四起

i kani Taiwan nanta samawan diya mu, mawmau inta na Pinuyumayan na pukasa sahar da ’apuc. nu pacepa da kasaharan mu, na vavayan lra di na ma’inayan lra mu, adikaadi mi’apuc nu mupacaran, mena’u ta mu salaw kasahasahar. nu mukasakasa ta kana duma data samawan mu, payas kurena’u data pinadangan di madalram ta pinicawan.

kinger ta da ma’ida’idangan mu, kemay a awac ini na ’a’upidan da ’apuc mu, ninta pinarevuwa’ adi ta miturus da cau kema.

na Pinuyumayan tu ’inupidan na ’apuc mu, na dekadekalr diya adi kamaresanan. maya’ da tu kalra’ayan melak tu kinasaharan na ’apuc na vira’ di na carun ’emupid.

na Ulivelivek a aidan diya tu ’ina’upid na ’apuc mu, mau na lranghi na radiradingan di na vuuyung. tu tinucali na carun mu, mau na ’arapenad. na lranghi di na radiradingan mu, tu ka’apucan nu ’ema’upid, na vuuyung mu, mau na duwa lra na Paylang ulra lra idu na kemadu. na ’arapenad mu temelriw lra i henahenan, nu ma’a’ayil lra salaw ngulringulr tu liwlran.

nu ’ema’upid mu tu pasedesede’aw semeredek na ’apuc na vira’, kavulayan nu mena’u ta. tu ’apuc kana vavayan mu maraupic, na ma’inayan tu ’a’apuc mu marakecivi da saema. aymu na ma’inayan nu adi diya kituvangsar mu, adi maruwa mi’apuc.

nu kadu ta i dekalr nu adi adawilr ta wadukan mu, mi’apuc ta da tatena’ da ’apuc mu, karuwa ta mulrepus pulihu data kakuwayanan.

inta na Pinuyumayan mu, melri nu kaadi madalram data pauwayan nu ’ema’upid ta da ’apuc di nu pu’apuc tada cau mu, ulra tu kapauwayanan,

semalra ta pulrepusaw ini na kakuwayanan.

卑南族喜愛戴花環，辨識度很高。何時開始？據傳古時便已開始了，是習俗。每部落的花環不同，選方便喜愛的花材。初鹿喜用萬壽菊、雞冠花、芙蓉葉。’arapenad枯萎時很香。編花時花和草隔著插來編，女人花環較細、男人則粗，但男子未成人前不戴花。

現今花種多，也有人會買塑膠花或尼龍繩編花。鮮花易枯萎，在近處聚會時用鮮花材，去遠處時用塑膠花材，也能維持傳統。身為族人都應該了解編花的目地及戴花環的意涵。