朗聲四起

i kani Taiwan nanta samawan diya mu, mawmau inta na Pinuyumayan na pukasa sahar da ’apuc. nu pacepa da kasaharan mu, na vavayan lra di na ma’inayan lra mu, adikaadi mi’apuc nu mupacaran, mena’u ta mu salaw kasahasahar. nu mukasakasa ta kana duma data samawan mu, payas kurena’u data pinadangan di madalram ta pinicawan.

kinger ta da ma’ida’idangan mu, kemay a awac ini na ’a’upidan da ’apuc mu, ninta pinarevuwa’ adi ta miturus da cau kema.

na Pinuyumayan tu ’inupidan na ’apuc mu, na dekadekalr diya adi kamaresanan. maya’ da tu kalra’ayan melak tu kinasaharan na ’apuc na vira’ di na carun ’emupid.

na Ulivelivek a aidan diya tu ’ina’upid na ’apuc mu, mau na lranghi na salriwangwang di na tu vira’ kana vuiyung. tu tinucali na carun mu, mau na ’arapenad. na lranghi di na salriwangwang mu, tu ka’apucan nu ’ema’upid, na vuiyung mu duwa lra na Paylang ulra lra idu na carunan. na ’arapenad mu temelriw lra i henahenan, nu ma’a’ayil lra salaw ngulringulr tu liwlran.

nu ’ema’upid mu tu pasedesede’aw semeredek na ’apuc na vira’, kavulayan nu mena’u ta. tu ’apuc kana vavayan mu maraupic, na ma’inayan tu ’a’apuc mu marakecivi da saema. aymu na ma’inayan nu adi diya kituvangsar mu, adi maruwa mi’apuc harem lra mu marekasaadulra ulra na micepa na tiyam menaniwan da ’apuc. tu ’inupidan mu marekamelrimelri tu valray, puwapuwa vulay lra. aymu muvalivalis ta lra harem, kaduwan na cau na maracang da parasarasan ’emupid da ’apuc, cemima’ kana sokka na ’apuc di na vira’, di tu ’upidanay da cali da sokka, ’inava ata masamasalr ’umupid da ’apuc kema. na kemani mu, nu mukuwa ta i dawilr adi ka’ayil na ’apuc di mi’apuc ta da sokka mu ’inava diya, nu kadu ta i dekalr nu adi adawilr ta inuwadukan mu, mi’apuc ta da tatena’ da ’apuc mu, karuwa ta mulrepus pulihu data kakuwayanan.

mutu Pinuyumayan ta di melri nu kaadiya madalram data pauwayan nu ’ema’upid ta da ’apuc di nu pu’apuc ta.

卑南族非常喜歡花。男女參加慶典一定戴花環，跟別族聚在一起時，能立刻知道他是卑南族人。

什麼時候開始戴花？從傳說：是從古老就留傳下來的習俗，是自己族人發明的，沒有學別人。

傳說古時戴花就是我們的習俗◦每個部落所編的花都不太一樣，選擇方便取得、自己喜愛的花、葉子和一些草來編。例如初鹿部落，以萬壽菊、雞冠花，還有芙蓉葉來邊。所用的繩索就是’arapenad。lranghi以及salriwangwang是編花時主要的花材。

芙蓉草是漢人來了以後才有的，’arapenad長在山上，枯萎時特別香。編花時花和草隔著插來編，女人的花比較細、男人戴比較粗，但男人尚未接受成人禮之前不能戴花環。現在花越來越多，也有專門賣花環的店，所編的顏色都不一樣，也有人懶得編一圈花環，就買塑膠的花及葉子來編，或用尼龍繩編的花，就不用常常編花。戴生花出遠門會枯萎，因此用尼龍繩製作的花環比較好，在近處聚會就用鮮花，這樣能維持傳統。

身為族人都應該了解編花的目的及戴花環的真正意涵。