朗聲四起

ini na aapuran na pakumelri na kakuwayanan mu, marayas ta mena’u za maapur za puran i Taiwan makaiyaiyan ziya harem, na payrang lra say na mingkok mu maapur. ’azi lra kamawan a awatr ziya tu inaapur kana Yēncumin. a aziyu ziya na sinalem mu, ’azi pinuwatremelan uniyan za padawak. na nasuk mu, vinatri’ kana sikiw.

harem lra na traker tu putremelay za padawak kana ’uled. nu maapur mu, tu punasukay kana nasuk na hareman. ulra na tu puwayay lra za zemiyar za nasuk, tu puwayay za kuta, ’azi ta malrazam za aeman tu zinawulan kana nasuk. mau na kemani zi muvalis mulremes lra tu pauwayan kananta kakuwayanan, zi amelri nu kanadaman lra ini na kakuwayanan.

halra na melri nu mawmau paka’uze’uzem paka’a’utrus zata walri, pakakuwaaleng za ’usi, zi mikuwaalengan ta za gang i udung lra. nu saleman na mikuwalengan kana gang i udung mu, karuwa za makawalu na trau na maapur kema merengay na ising. semeneng nu maranger ta marayas daliledik, temaranapawa ta zata pinizazekan! ta ’atelranay pudawilraw ini na aapuran mu, karuwa ta temala’ za gang i udung.

ini na mikakuwayanan za karayasan paka’itrelas za udung zi pakadalikedik ta zazek mu, ulra a pidaya tu ipananadam kana ising, ta piyalikuzaw ta lima ’azi ta kiyatuluz za aapuran, amanan na puran ta kuwayaw. na makatelun ziya tu ’ami na trau mu, kemure ta za wari mukuwa kina’uwa kana ising zata udung. taranapaw za kadalikedikan za udung, nu piya ta ziya mekan ’azi ta melalavat za parekazuwa tuki zi kingisil misaus ’ematimuremure ta za walri.

nu kemirarakaz ta meretra zi ’azi ta kiyaseker maranger ta mapur mu, karuwa ta pakalrang za teluwa na kararuwayan venulas paruveli zanu ’elale’elan paziyazi zata ’areseman i udung, kingkinger ta za semasenay, merenarenaz ta, venangavang kanta niranger kana puran. marayasa ta pasenkin za anger za kuwatreng na aapuran. ’emau’au ta za zanum zi ’emele’el ta za tunak, pakasa ta meretra’ za aapuran, uniyana ta za aluzunan i anger.

pakelrazam ta za trau za mukasaya munayuna nanta dalikedikan, ’aziya ta mavangavang za kuwalengan kana gang.

嚼檳榔是近幾年來常見的不良嗜好，它不是從前族人所嚼的檳榔。不論是檳榔、檳榔葉或石灰都是用有毒物及不明物所製造，它失去了原有的文化意義，也危害牙齒健康，拒嚼檳榔是遠離口腔癌的第一步。

保持口腔健康的方法：向檳榔說「不」；30歲以上，定期接受口腔黏膜檢查；三餐飯後30分鐘內要刷牙漱口。可以聽音樂、做運動、勤喝水、改嚼口香糖，維護身體健康。拒嚼檳榔你我一起來，讓健康久久沒煩惱。