朗聲四起

asuwa driya. malladram ta dra melaleel dra puran ta temuwamuwan aw ta maaidrangan. adri ta menanau dra melaleel a llallak. adrunu driya. na puran i, nanta sinaleman i paliyuliyus kana ruma. na traker i, nanta sinalem i bakabak. na abu i, tayta na temuketuk kana sikiw. an mutuwaemu lla i, ta triyuraw dra enay. ta sinalem na puran lla, na traker lla. adri ta puwatremel dra padadawak kana uled. adri ta pareuriuri dra manay driya kana abu i sabak.

garem i, marekainaba ta inuwabaawan kadri punapunan. sadru tu pinarebuwaan dra trau aw marekamenimeni. tu niyaleel dra trau garem i, adri lla kamawan a asuwa driya. na muwauma maranger pakabulay dratu sinaleman na puran aw na traker i, tu parabasay putremel aw tu drarukaw. salaw bulay aw silamu. na abu i, tu uriyay dra manay aw, pakamelli sagar meleel a trau. an meleel lla i, adri lla tungtung. marekakadruwan tu pinitrauwan kana emelaleel kana puran.

alla sadru lla dradru tu ineleelan na puran aw udreudrem lla, mautrus lla, matiatu lla aw nana lla tu walli. adri malladram dra minanayan dra pakireb tu indan. muka lla kinauwa dra ising i, miyauled aw matupa tu indan i sabak. amau tu ineleel na puran na pakakuwatis kantu walli.

ta kinalladraman na minanayan dra matupa tu indan i, kadruwan na emelaleel dra puran. garem i, malladram ta lla dra amelli a inaba idri na emelaleel dra puran na kakuwayanan. ta asallaw aw aeman na emeleel dra puran. adriya ta mulelep dra kuwalengan dra indan.

an tu paleelay ta dra trau i, ta babatiyaw pakalladram dratu kuwatisan kana aleelan dra puran. an maranger ta pakainaba drata dradrek i, ta kakeseraw madranga ta emeleel dra puran.

na mulipas dra makatelun tu ami na trau i, karayas muka kinauwan dra ising dranu walli. an mikuwalengan ta i, payas ta kiputremel.

an peniya ta mekan dra manay driya i, misaus ta matrimuremur ta. adriya mubilin ta inekanan drata walli aw drata indan i sabak. an meretra ta emeleel dra puran i, tu pakiyangeraw ta aw magiyan ta dra aleelan. uwa killengaw dra senay, uwa merenarenadra, uwa treketrekel dra enay. adri i, eleel dra tubi. ta kalladramaw tu inabayan drata niretraan emeleel kana puran. pukedrang aw pakainaba ta drata dradrek.

以前的土壤、植物、石灰沒有汙染，家種檳榔用來招待親友。如今檳榔、檳榔葉、石灰都已經被汙染，失去嚼檳榔原有的文化意義，也危害牙齒的健康。現在嚼檳榔的人多，檳榔攤多。水田和山上都種檳榔。多數口腔癌患者有嚼檳榔的習慣，為了健康，拒嚼檳榔是第一步。保持口腔健康向檳榔說「不」，定期口腔檢查，飯後刷牙漱口。當戒檳榔時，可以聽音樂、做運動分散注意力、勤喝水、嚼口香糖。時時提醒自己拒嚼檳榔維護健康。