朗聲四起

na mauwan kadri Taiwan i, maumau na Pinuyumayan na marasagasagar dra aputr. an ullaya a kasangalan i drekall i, adri adri emupidr dra aputr aw miaputr. an kurekasa dra druma dra mauwan i, kemay dratu piniaputran. payas ta malladram dra i manamanay tu trau kana Pinuyumayan. kurenauwan aw kallayullayu an menau ta.

tu kakuwayanan na miaputr. alla kemay a asuwa i? killengaw dratu maaidrangan dra benabati i, nantu kakuwayanan kemay a awatr driya. amau nantu temuwamuwan na parebuwa. amelli a kinurenangan.

an emupidr dra aputr a Pinuyumayan i, menau dratu kinasagaran na aputr aw dratu sinaleman na aputr. aw dratu kinalleayan maya dra tatilu aw dra bira. mitatilu dra rengas, dra trabai, dra triwatriwar, dra daramiyan, dra sallu, dratu bira dra puran, dratu luna dra bellbell. tu aputr i, a llangedres, a pulikudrakudran, a kumiya, a pudrangiyan, a puiyung, a muus. an emupidr dra aputr dar i, tu karesasayaw na aputr paladiladiaw tu edad. a murekes a mukasa tu wanger kema tu pauwayan. salaw mibati aw kemapadrangal menau dra aputr a Pinuyumayan.

asuwa driya. tu piniaputran dra maaidrangan i, a inupidr dra llangdres aw dra puiyung. salaw ullingull. an maupidr dratu piyaaputran dra maretratrebung i, a pinalletengan pakabulay. an miaputr lla i, mangaleb bulay na babayan aw bangesar na mainayan.

na inupidr kana baaw na aputr i, salaw bulay. amawna, an mauka i dawill kurenanga dra kasangalan i, kakuwalengan ta kemasu. an numa i, mupiya lla tu sinalem na aputr. uniyan dra aputr dratu aupidran. muka tremima dra aputr kadri singki. an patrepa dra padradrangalan na aputr dar i, adri lla malemu tremima.

kemiyanger lla a babayan kadri Pinuyumayan. ullaya a marekamenimeni a dinadawayan a aputr i singki. muka mayaa dra aputr dra kiyarepauwayan emupidr. kalleayan kemasu muka isuwa driya. adri kuwaatis; adri lla mabangabang emupimupidr. marekakadruwan lla tu nirumaenan na emaupidr kana dinadawayan na aputr. amawna, an patrepa dra kapadrangalan dra kasangalan i drekall i, emupidr kana baaw na aputr. marabulay aw marapadrangal an menau kana inupidr kana baaw na aputr.

卑南族有戴花環的習俗，從古就有◦編花環先選擇所種的花種。草繩有：月桃、檳榔葉鞘、蕨類、稻草、傘輪草、檳榔葉、香蕉莖等。花種有：有萬壽菊、菊花、千日紅、雞冠花、艾靳、梔子花、排香草等。用不同顏色的花搭配編串，代表族人團結同心。早期的花環是用萬壽菊和艾靳，編製新人的花環尤其用心。

若要遠行去跳舞、唱歌、參加喜慶…，攜帶真花不方便，於是找假花編製方便攜帶，但部落重要慶典，一定用鮮花編製花環。