朗聲四起

“drering...! drering...!” kema maruni na pararunian. a katalaulepan lla dra sinsi aw dra temakakesi garem. kemay i takakesian mupatraran na temakakesi. salaw semangal aw buriawan na temakakesi.

kadri takakesian i, ullaya na maekan driya dratu kakeenamayan. alla puwari mekan a semaluwan i! ullaya na meladaladam semenay dra temarapuyuma lla, dra temaramingkuk lla. ullaya na tematilill dratu tatatilillan. alla adri tu pasekadri tu tatilillan a daman i! ullaya na maaip dra batibatiyan, ullaya na temutrautrau, ullaya na mauka mabaka dra enay tremekel. ullaya na muibaibat. maulid ta dra mabangabang dra manay.

kadri baybay i, ullaya na mauka mayaa kantu wadi. alla ullaya tu taturuwan dra ngai i! ullaya na mauka kiputremela. alla ullaya tu nanayan isuwa i! ullaya na marepallulluy. patrepa dratu pinauwanaw kana sinsi. aw tu kadrekiyaw. ullaya na mateang. alla kemiyaanger dra manay driya i! ullaya na mellasellas marengay. alla amau na adri maranger pakillengaw dra trau i! ullaya na maagell muka i puwatraiyan.

kadri renarenadran i, ullaya na malalinay dra mali. maaraaraw kana mali. mudirus dratu marelladek! ullaya na malalinay dratu kalalinayan i takesian. na kalalinayan i takesian i, esadru aw marekamenimeni. ullaya na mukulukulung kadri tralutralunan. miyatralun lla tu kiruwan. ullaya na kuwareis dra kuwareisan. ullaya na muturik i saninin mangangara dra kuwareisan.

an garemaremay i, killengaw ta dra kemesikesik. an garemaremay i, killengaw ta dra emuiuy. an garemaremay i, killengaw ta dra saaeru. saliyakesikan aw maysemangalan na temakakesi.

kuyku i, marenang mi kan ngidralli. muka mi menauwa dra naniyam sinaleman kadri takakesian i likudran. ullaya a kulang, a kadumu, a bunga. bitrebitraw na tralun na temelliyu; drimutraw na maekan kana kulang na uled; na trallebek i, niyam llatudray. an numa dar i, muka mi menauwa dra aputr. sadru na mubaba na aputr. salaw bulay aw ullingull.

“drering...! drering...!” kema maruni na pararunian. “asuwasuwa mulipas idri na muketrep trektrek na katalaulepan.” kema na temakakesi. na kadru driya isuwasuwa na temakakesi i, garusegusan pabekas muka tremepaya dratu takakesian temakesia!

「鈴鈴鈴…！鈴鈴鈴…！」鈴聲響了！是下課時間，學生從教室衝出來！教室裡有人在吃早餐、學唱族語歌、學唱中文歌、寫作業、唸故事書、在喝水。走廊上，有人去找弟弟妹妹、去醫務室，有人在追逐挨罵！有人在發呆、說悄悄話，有人要去上廁所。運動場上，有人玩球、玩遊戲器材，有人在草皮上翻滾滿身是草。我和好朋友到教室後面看看種植的青菜、玉米、地瓜、拔除長出來的草。

「鈴鈴鈴…！鈴鈴鈴…！」鈴聲響了，上課去囉！