朗聲四起

Rudan Sediq cbiyaw u, pngalan dha tmhangan kana ka ini pntna dhiya Sediq kluwan, sow ka Tanah Tunux, Plmukan mi Swatan pa, adaw dha kklaan pnhangan ima ka dhiya, manu ka hangan klalang nii u uxay tnhangan rudan ta kana, bnhangan dha kari klalang icil ka duma. Niqan kingal klalang sundha nami “ Damay Doriq, ” mnru ka sundha Damay Doriq nii way tnhangaan nami sediq bhuway. Sow nii ka kari bnhangan mu rudan alang Toda. Tna nniq quri alang Truwan hini ka rudan ta ciida da enca. Niqan ka kingal diyax enca, miyah dhuq alang hini ka kingal sediq miyah tmsa kari Utux Baraw, encuung ini tsa sow kari daw, tsaun na tmuting parih ka sediq alang mi, stsa na smmalu puniq dha ka qbulic ka rsrinaw alang. Mwaya balay ka sediq ciida, spoda dha Waya kana oda dha, kiya ka uka balay dsnaw musa mbahang kari Utux Baraw, ou hari ka dqridil mi lqlaqi ka musa mbahang kari tnsaan na kari Utux Baraw, adaw smnuul bubu dha ka laqi, mniq ka dsnaw alang daw, wana ssalu puniq dha hhanguc qbulic ka kuxul dha balay slluhay.

Enca ka kari dha, adaw mdrumuc bay tmsa smmalu puniq ka sediq mptusa kari kiya, kiya ka kndalax ciida ka niqan ta puniq baang da enca, balay bay u puniq ptungan ka dnuuy ta haya enca. Puniq ptungan nii pa, asi ka lmngu taxa mi mutung ka taxa, sqama ka pedu mi clingan na qbulic puniq dow pspruq cmbu ka puniq da. Cbiyaw u uka ta putung, mutung ta qrari btunux, kiya ka mcbu ta camac ciida da, asi maku wada qduriq mbahang mutung qrari btunux ka camac da. ini sow ka puniq baang nii da, ini knttu mutung qrari btunux ka kiya da, kiya ka malu bay buwan ka camac da, kuxul balay dha dmui rudan ta. Ana bay rabang uri, ya bay ini dhuq kingal kngkawas ka nyahan na sediq mptusa kari kiya daw, knttu mdngu bay karac ka bsiyaq ini quyux, ini kuudus mi kddngu huqil kana ka pnhmaan dha, asi maku ini kmbaka ka uuqun sediq Truwan hiya da. Kiya ka mpprngaw ka rudan alang dha sediq mdudul alang, ana ini kmsruwa ka sediq mdudul alang u, wada dha qulung spoda Waya ta mi, wada dha umalak tunux ka sediq mptusa kari kiya da. Pusu na u, ririh sow way miyah smliq Waya ta ka tnsa na kari kiya enca, way msaang ka utux da mi kiya ka ini quyux ka karac. Ana alang qbsuran mi sediq ana ima ini ppangan kari kana enca, adaw ka paru balay dnyawan na quri alang ka sediq mptusa kari kiya, ana dhuq saya u psrnu balay rmngaw rudan alang ka kari nii.