朗聲四起

Ku pawkalrivili kadalameturamuru ki bariangalay luiyane. ngualaylringa ki alrivilrivane, matiadalame kikathalray pakabusuku maduane.

Ala dreelane ikay ububulane ki lriilringulu ki cekele ku bariangalay, kudra puliane lrapungane ku puupu ku rigay, sangungeangea kusasesesevere, ikay ki takasaleesane ki ubuubulane, laluulukuane madu, pangiabalay suasulrape, pelaela ku yaadringi ki kidredreme madu.Kadrua ku tamalranenay pilutu iluku putavanane, yakaikay ubulane ku tavanane ini.

Lukelanga madu balriw, yakay ki gathimi ki kidremedreme madu ngulrialrialringaw, kidredredreme. Lrikidredredresenge paimaima ki lraw, eleelethe ledraedra ikay ki maca ki lrese ini, ai wapatukululu iya ku kidredreme madu kakukuru turamuru. Ku ubaisane madu ki bariangalay, alaka singikalavavalakeana madu kipasudalepenga.

Kikay samathingathingalenga madu ki drumane ka mialri ka kacalrisiane, ala pucuugu kikay bariangalay alaka bengelray ka kibekace lini ki langudradrekay. Kikay Ngudradrekay wasaraw ikay tali Takaw Muga si tali Akaw Vedaygu, kikay laumaumase kay masasatalu makebekebere ki nibekacane, kaamani ku kathalray ka mapapangale lalalake ki wabekace ka Tuaumase.

Ikay ki lacekele ki Ngudradrekay, ku languumaumase kailrimaka cacapange sibengelray, lritarapaathingalane su pasikaiyane ki sakacekele, lumapalrailraingi ku latarudraudrange, ala lribaai musuane ku vaeva ku Bengelray su ku bariangalay pasibengelray pangiragelane musuane.

Lakamani, ikay ki kalalrisiane, lukamakaakalra ku sangiragelanane ki laabaibay, ku tapakasipialane ku bariangalay macuculrudu lakatinukucingalrane turamuru, asiluiyane amani ku takithingalane ka ngituatumane ku takaumaumasanane ini.

Ku lrigu ki Bengelray, ki tadreelane ki Ngudradrekay, paramia kay ku matisamaliane ku patharetharevane, ala tualadhaku pulringalringawnga, alaka ngimiyaiya kay ku tamacacapilane ku akulianenay, kaikaningubeebelengane ka nituduaduadhane ka kakudhane iyanganaku!

Ku takapalrealrebane ki nibekacane, athingalane ikay ki vavaeva ki bengelray, laikamanianenga ki manianianiake ka lapuupu ka tangipaipadhane ki labengelray!

百合花潔白的樣子非常惹人愛憐。我們從來不摘它，大地才是它最自然的家。我們對於百合花的情有獨鍾，是與生俱來的情感。百合花是魯凱族的族花。魯凱族人和大自然互相依存，是山神最得意的子民。不可以隨便配戴百合花飾，必須有所貢獻，經過耆老同意才會賞賜百合花；百合成了神聖的族花，小米成為珍貴的食物。

大自然的神奇都會在花朵中出現，只要有土地的地方，天然花草都會帶給我們莫大的歡喜！