朗聲四起

Makalra ku vavangane ki lavavalake, madalamaku kivaavange.

Makaelaela ku kadalame madu ku vavangane ku akivavangane taelre ki papalra madu.

Kunay ka Ngudradrekay lukalavavalake madu, wasilape madu ku akivavangane madu, lakaikasepele, lakiraragay madu, lumadredrelane, luikay madu gaku, ikay madu balriw.

Ku vavangane madu, pia ki latama madu. ki latina madu, yakay lungipapia madu, yakay ku kuakuange ka balebale, lamalra madu ku madru ki batese tu nanuku, lamalra madu ku lrenege ku tulru ku lrima si pakiaw, yakay luarakaiyane ku angatu ku lrenege tusapakiavane tinumateletelenge, akanekane, yakay lutinulrakeakedalane ikay ki nigiasane ku taypiane ku biceaceka, yakay lubaubacungane, duudukulru, yakay lupangithithilibi ikay ki baiyu, yakay lumakalrualrumalane papacase zeazega.

Lutakalrane, lamakevakevele, matuhulriw, wabaata wamangevenge, walanguy walredepe, walrabuale, walailay amia kay suaveday, yakay lumaluulucane, yakay lumadradrikisi ku alrima. kay laabaibay makalrualruamale caicalrisi, makucukucu, bekelane ku vavangane lini, kay sawvalay yakay lumakalilisi mapagelregelrethe, lakikaelaela, lasaasa.

Yakay luatiatinane, tiatina su laiya madu, taatama su laiya madu ki ataatama, latudaadane, sirapale ki lalake, miaki marudrarudrange si tubitubi, dralradralray. matiadaadalame.

Ai kikaynga, matuasenga mupairange, lakakadrua ku yakay cekele balriw ku lavavalake, lakabekelane ku tataelreane madu, lakaidu thingale kawriva ku vaga madu, tabekelenga ku taalrailragi madu, ku laaliali madu. anatumune lasiulri ku tangimiamianenay laiya ku, lupelaelaela ku kayngu, ku ina, kudra navavangane lini, ku nakivavavange lini sakalavavalake, lapusamalraku turamuru.

Lutuvaavangane, lukivavangane, takuakibulrubulru madu, ku vaga, ku lrigilane, ku kakuakudhane ki umaumae si sakacekele, laarukalrigili madu, latakalra ku kisudalru madu ku laali ku talragi madu, mathariri turamuru.