朗聲四起

“tang! tang! tang!” kema maruni na pararuniyan. a katalaulepan lra za sinsi zi za temakakesi harem. kemay i takakesiyan mupatraran na temakakesi. salaw vuri’awan.

kani takakesiyan mu, ulra na maekan ziya zatu kenamayan. alra mu piwari mekan a semavalr kemaku! ulra na menadanadam semenay za temarapuyuma lra, za temaramingkuk lra. ulra na venavalray zatu vavalrayan. alra mu ’azi tu pasekadi tu vavalrayan adaman kemaku! ulra na maiyup za vativatiyan. ulra na ’ema’aw za zanum.

kani salripi mu, ulra na mukakuwa maya’a kantu wadi. alra mu ulra tu taturuwan! ulra na mukakuwa kiputremela. alra mu ulra tu nanayan iyan! ulra na mavarelrarelrang. tu trepayay na sinsi mena’u, zi tu kaselruwaw. ulra na mite’ang, alra mu kemiyaanger za eman! ulra na malraselras marengay. alra mu maw na ’azi maranger pakinger za trau! ulra na maahelr mukuwa i watra’iyan.

kani lalinayan mu, ulra na malalinay za mali, ma’ara’araw kana mali. sapene’ zatu saringan! ulra na malalinay zatu kalalinayan i takesiyan. na kalalinayan i takesian mu, sazu zi marekamelrimelri. ulra na mukulukulung kani tralunalunan. mitralunan lra tu kavang.

inku mu, salrangan mi za i ngidalri, mukuwa mi mena’uwa za niyam sinasasalem kani takakesiyan i likuzan. ulra a kulang, a kudumu, a vurasi. na kazu temelriw na tralunan mi uvutraw ; niyam ki’uleday na kulang ; na tralrevek mu mi lratuzay. mukuwa mi mena’uwa za ’aputr. sazu na muvakar na ’aputr. salaw vulay zi ngulringulr.

“ tang! tang! ” kema maruni na pararuniyan. “ kemazu lra lriketri ini na talaulepan ” kema na temakakesi. na kazu ziya iyan na temakakesi mu, pakunamun pavekas mukuwa tremepaya zatu takakesiyan temakesiya! 

「噹!噹！噹！」鐘聲響了！是下課時間，學生從教室衝出來，很熱鬧耶！此時，教室裡，走廊上，各處都有人。運動場上，有人玩球，搶來搶去，流了滿身汗。有人玩遊戲器材，有人在草皮上翻滾，弄得滿身是草。我和好朋友到教室後面，看看我們種植的青菜、玉米、地瓜。拔草、捉蟲，或間拔。也會去看花。

「噹噹!噹噹!噹噹！」上課了。「十分鐘的下課時間，過得真快啊！」學生說，不論在任何角落的學生，都奔向自己的教室，上課去囉！