朗聲四起

ini na padadurina’an za ’aputr mu, maw na saasaleman za ’aputr. maw na pakavulavulay kana takesiyan zi maw i ruma’. nintaw nana’uwan za trau. nu temulralre’ay ta mena’u kana padurina’an na ’aputr mu, kamawan ta za paailran kana ve’enin, ta puwayanay peniya ta anger, nu purupatiwla ta mu, na tralunan mu, tu atravay lra na ’aputr. nu maranger ta pakavulay kana tu pini’aputran zi vulay nu mena’u ta, ’azi mawmaw temapesi’ remevay kana tralunan. na marum tu sa’az zatu vira’ ta haretimaw ’ematelr. nu semasever mu, ta pudarukay kana patremel. nu ta kasazuwaw temapesi’ zi nu pasalaw ta iputremel mu, matupa’ tu rami zi minatray. maw izu nu mena’u ta kana padurina’an mu, ta pahetemanay zi ta pangetrengetranay ta anger, ’azi ta temaatelak za ta inana’u.

inta mu ta kazalramaw na eman ’aputran mu mi’aputr nu kaseveran, ulra na’aputr mu, mi’aputr nu derun, zi ulra na ’aputr mu, kana wariwari ziya mu mi’aputr, ulra na ’aputr nu mi’aputr mu sawariyan. ulra na ’aputr nu semavalr mu, mi’aputr, nu alusu kadaw mu, ma’ail lra. nu mazalram ta kana ’aputr nu aidan mu semalem ta, nu aidan mu mi’aputr, maruwa ta pakamia’aputr kana sinaleman na padurina’an na ’aputr.

inta na Pinuyumayan mu, nu patrepa ta kana ta saasaharan, ka’azi mi’aputr kana ’inupiz. maw izu inta na mawan ziyan mu, nu midare’ za makiteng mu, ’azi malaalup semalem kana vuiyung, na kungiya, na lranghi, na tamulamulang, na ’asap, zi maw na tava, nanni na ta ina’upiz na ’aputr.

na hareman na trau nu pararahan mu, tu piangeraw kemuret zatu saasaleman kana ’aputr. ’azi maya’ za marekamelrimeri, maaya’ kana wariwari mi’aputr. nu vulay ta padurina’an na sinaleman kana ’aputr, nu mena’u ta kana ’aputr mu, muvakar ta piniangeran. inta mu nu saasalem ta za ’aputr mu mazalram ta lra kana tu ngadan na ’aputr, na marekamelrimelri na sasalem. nu miwari ta mu, ulra ta awayan pahuahuwan za ta urauratr, zata ukak.

ulra a ngai marengay “mena’u ta kana tu sinalem na  ’apu’aputran mazlram  ta za ’iyanavayan nanni na saruma’enan za makakuwatreng lra”.

ta pilingaway ta sinalem na ’aputr kana wawariwari.

花園用來美化校園或家園，也可觀賞。花園要用心照顧，否則雜草就會把花蓋住。除了澆水拔草還要剪去枯枝敗葉，定期施肥。水肥不過量。要知道那些花的開花季節。使花園花開不斷。卑南族人每逢歡慶都要戴花環，所以族人的家裡只要有空地或園子，不忘種些編製花環的花材。蓋房子留空地來做花園。有花園的房子顯得富貴。看花使人心曠神怡，能認識花的名稱、品種，也讓我們閒暇時調劑身心。有人說：「從花園的榮枯能知道這家人的盛衰。」