朗聲四起

“ Seejiq ” ksun ga, ida niqan tru klgan, saw ka Seejiq Truku, Sediq Toda ni Seediq Tgdaya. Sbiyaw han o ida mnniq daya pusu Yayung Mtudu kana, kndadax alang Paran bitaq alang Truku, ida nniqan Seejiq kana.

Seuxal ini iyah qmlahang Taywan ka Tanah Tunux han o, alang Seejiq ksun ga yabi wada hari dhuq kingal kbkuy spgan wah! Yabi wada hmrinas egu bi spgan uri wa! Ana naq ini ktna hari ka hnang kari o, ida mtduwa pprngaw. Niqan ka ini ktna na pusu kari uri, ana saw kiya o ida tduwa pprngaw han!

Smnru ka rdrudan alang o, “gaga mniq hruan hidaw Ka-reyn-ko hiya duma ka dadal ta wah! Yasa kndadax alang hini wada thjil hiya ka dhiya” msa. Yabi wada hari spac bitaq rima kbkuy hngkwasan ka tnhjilan dha da. Ada ka wada bsiyaq tnhjilan dha dni maku ini klai kana ka dungus bi jiyax tnhjilan da.

Yasa wada bsiyaq balay ka pnswayan da, manu ka sayang do wada mangal hangan “ Truku ni Seejiq ” dha klgan da. Kiya do saw bi ungac pnegluban ka Seejiq sayang da. Klwaan sayang uxay uri o klwaan eseisil o, psgenakun ta dha qmita ka “ Truku ni Seejiq ” ksun, balay bi o kingal lutuc nrudan ka Seejiq.

“Seejiq” ksun ga uxay wana pusu alang hini ka ga nniqan Seejiq, manu ka hruan hidaw Ka-reyn-ko ni Yi-ran o, ida niqan alang nSeejiq uri wah! Kana do yabi wada hari niqan empusal ka alang nSeejiq ksun. Saw ka gaga tgimax mniq alang seejiq Truku ni Amis hruan hidaw “ Hwa-reyn ” duma, gaga tgimax mniq alang Tayal Yi-ran hiya duma uri. Kiya ni laqi snduray do wada ini kla msa tnSeejiq ka pusu rudan dha sayang da.

Sayang duri o ada ka mneuyas patas, ada ka qqpahun, ada ka mstrung, wada kkghak teginu alang ka Seejiq da. Ini saw Seuxal asi tngkingal alang mniq da, ida hbaraw bi ka wada tgeimax mniq eseisil alang uri wah! Ana nanaq saw kiya o ini shungi Seejiq ku inu ka yaku do malu da.

賽德克族包含都達、德路固、及德固達雅群，原居於濁水溪上游、今霧社至靜觀一帶。耆老說：「我們有親戚居住在花蓮地區」，約四、五百年前，祖先由南投往花蓮地區遷徙。直至今日，賽德克族分布就如現今的狀況，不僅居住在祖居地，花蓮、宜蘭地區也有部落，現今他們的子女已不知道祖先是賽德克族。