朗聲四起

izua ta kuvarung, ti vuvu i Ljuzem mavan nua tjalja nanguanguaqan a caucau i kacauwan. iniyake selangeda tu izua pinakisankuya nimadju, iniyake pacun uta tjai vuvu tu remumalji ta timaimanga, na saceqalj sakamaya a kinamudinganan nu secevung tjaimanga. ti vuvu macaqu aravac atjemaucikel ta milimilingan kata semenay ta si kivangavangavang a senay na kakedriyan. a kinatjengelangelayan a keman nimadju mavan a vurati. izua nu tjevasain sa siyavan ta vutjulj, izua nu vineljukuin sa puqecevi ta cinavu, izua nu rindraridren sa pupaketjavi, izua nu si pakesa ta paday, malaing tu kudain a kemesa ni vuvu a vurati.

ika masutjaucikecikel ti vuvu, liyaw aravac a situlutulu a sipazazekazekatj tjanuamen. nu keman itjen a kakedriyan, nakua keman ta kakudrakudralan ta nasanguaq a vurati aya, maruqu mun nu mavavua mun aya ti vuvu. tja sipasangav tjai tjama tjai su vuvu a ramaljemaljeng a maluljaluljay aya. nu seman siyaw ta rinapanan, iniyake pacun tjaimadju tuki tjaisangas a keman ta ciqav ta quzang ta gang, semiyaw sakamaya sa pasangavan tjanuamen a pinicekelj a nasanguaq.

izua sinitjaucikel uta nimadju tjanuamen ta nakuya a keman ta tjulja a kakedrian aya, mavuca mun aya ti vuvu. aicu a tatuluan ni vuvu tjanuamen, nakuya maramilj, nakuya patalaq, nakuya ika kemeljang ta kipasangav aya.

rupakisamulja aravac uta ta kitulu timadju. maljiyananga a nu sineljavakan a zidai aya, nu ika tjen a kikavecengel a kitulu i gakku anema nu sikizatar ta pairang nu ngidanga aya. tjalja sipuliyavan a qivu ni vuvu azua, maya mavudraqut! kasetukezu! aya, katua maya liyav a kai na kakedriyan, a kakedriyan masi calinga, nakuya masi angalj, aya. nu izua saliman na nia sikataqaljan, “sau ljaqunu! sumusu ti tjaina ti tjama!” aya. “sau paljiljii! ti su vuvu kikemudakuda anga.” aya! aiyanga a pakisamulja ni vuvu.

nu ku galjuing a kipaqenetjanan tucu, aicu a tjaucikel a tatuluan ni vuvu anga a si papuvaruarung, a si pakisamuljamulja tu paqaljayu, tu kiljivaku, ta vavulungan a caucau aya. titjen a kacalisian liyav angata a tja kakudan a pasamaquliqulip anga, ari kisamuljai! ulja na mapuzangal a tja ramaljemaljeng nu ngidangidanga.

vuvu Ljuzem在我心中是全世界最好的人。因為我不曾看過她大聲駡他人。她也很會說故事和唱傳統唸謠！vuvu總有說不完的教誨，她說小孩子不能吃比較大的地瓜，要把大的留給長輩吃，若有機會煮溪流裡捕來的魚、蝦、螃蟹，她總是先喝湯把好吃的留給我們。她會勉勵我們認真讀書，vuvu總是不厭其煩的教導我們！她總勸導我們懂得敬重長輩們。排灣族優良的傳統美德逐漸消失了，讓我們一起努力讓長輩看見我們的用心。