朗聲四起
Cbeyo bale hayan we, wano ba keeman nanaq ka bobo dheran ciida, uka diyan. Mqraqil bale kndusan seediq ma ini krana ani tikuh kana pnhmaan seediq duri.
Niqan kingal ali, hmiru harung daha riso alang, thhiru mmaha qmeepah neepah daha. Inu dungan, mnetun bgihur spgeriq paru, wada hmuwa pgriqun quri karac baro ka daha rseno nii di ma, pqeya naq karac baro hiya, kika ga mddaha mghido di. Daha hido nii de mssriyux pledax bobo dheran hini, mgeqi kingal de mnkala ka kingal dungan, so nii diyan klaali ma uka keeman. Maku mdengu mhuqil kana pnhmaan ma uka ppuqun ka seediq alang, kika skkingal mhuqil ma kndudul mrana hnqilan seediq alang di.
Kiya ka msseli kana seediq alang ma mpprengo, “Ima ta ka mmaha mtduwa mosa cmebu kingal hido ha?” Niqan ka rudan, riso ma riso hari ka mkmosa cmebu hido, kika gmao daha rudan, daha riso ma daha riso hari, skgulan daha mmaha cmebu hido. Gmabul mmaha ciida ka dheya nii, stngayun daha tmquri qmuru sekuy ka demux macu, pndaha qmuru sekuy tmquri ka dheya nii ma, lhugan daha waso birac. Madis tlahi ppuqun moda eluw ma kssiyo srehak eluw ndaan ka buuc na.
Ado theya bale eluw ddaun daha, meniq ka daha rudan kii de, wada moda mhuqil eluw ma ini dehuk. Meniq ka daha riso ma daha riso hari we, wada qulung dehuk hhreyan hido. Kiya de psnama mcebu hido, ga bale smtarang kingal hido ka dheya nii. Cbuun ma kmaxal daha, kika mgeqi kingal hido de mosa smbaang tgkingal hido dungan. Nii ba hani so mnkala hido kii we asi daha pstrengi cmebu. Wada daha cbuwan ckceka ba bale hei na hido kii, asi lux mquri nganguc cmeriq dara na; kika kndudul amah uka ledax ka hido, kiya ka idas ga ta qqtaan karac baro saya di.
Meniq dara na de ga naq sbbuli karac baro duma, mdengu so tqpuruh ge kisi pngerah ga ta qqtaan karac baro saya. Mtuting bobo dheran duma dara na, mdengu tqpuruh de wada mgbtunux paru so bobo dheran. Peeyah ciida, msngali bale kingal hido di, kisi niqan keeman ma niqan diyan, wada mqaras riyung kana seediq muudus bobo dheran hini duri di.