朗聲四起

Ma-aq ata ka bunun miqumis haan dalaq nastu ti ka, palalanduu ki vevivevi siduh tu bunun, heza Ketnanu, heza Puut, heza Ngaingai, mintun is palanduu ki Danqasqulbu nait Taqdunglaas. Ma-aq is tastuqani-an a, na nepas ni-i tu mepasaduu amin i madadengaz, mendudu-az, uvavaz-az nait hubuq.

Ma-aq is malkabunun a, asa tu piszangun anak­-anak madedaz. Ni-i ata bunun mazima sapditan i bunun, ni-i amin mazima satamalan i bunun. Mopa ti imita melantangus masnava mita tu, asa ka madengaz tu pisihal sepuk madedaz i uvavaz-az a, na tudiip a uvavaz-az masihal matalbuq taldaing, asa ka telutpu in tu maqasmav munquma nait kasui ta issepuk i tastulumaq, uu ka na heza ka qesing konun, na heza amin a sui ka ispa-iu kis san heza ka mihalang, asa ka uvavaz-az tu kapimopa issia madadengaz tu sintataqu, matinmananu mapasnava ki qansiap, matunahip nai ta, mapisvala inai ta tu is-aang.

Ma-aq is munhaan pasnanava-an a, asa tu malmananu mapasnava, ni-i tu matupanu, ni-i tu mapakahahau, ni-i tu islansan i madidikla tu bunun. Ma-aq is masihal su-u ka pesnava-an a, mapinahip i issia tamatina tu is-aang. Ma-aq is ilumaq a, kapimopa-a issia tamatina tu sintataqu, kapimopa-a issia masituqas tu sinkalun, madedaz masinoba, mopa ta saam tastulumaq malkabunun.

Ma-aq ata Bununtuza qabas a samasqing nait sepuk i madadengaz, ni-i tu maqtu ansais, ni-i tu maqtu saqalmang. Masamu kis-ang haan bunun tu tanangaus, masamu silalaluan katmang siza itubunun tu qemangsut. Asa tu masihal malka-uni mintinalu tu uvaz-az, masamu maqenan i mapiqa, mabu-al, matola siin penitazan tu binano-az. Asa tu maqazasqas malkabunun, masaivsaiv is heza-an. Ma-aq is pakisaivan a asa tu masaiv, masamu ni-i tu masaiv, na sadu-an i issia ta tu qanitu.

Ma-aq qabas a madadengaz a, ma-aq is minunquma ba-av, sanavan in mesnahaan quma mudaan tu na munlumaq, mama ka madadengaz i nait lukis nopa qemangsut nopa, ma-aq a talmamenduu nait talbibino-az a, maqalav mama solumaq. Mopa ta tu asa ni-i tu mapiqdi ki madadengaz.

Ma-aq is heza ka ni-i tu ukemazan i kuzkuza-un, mundiip manahiav, sohaan kanaqtungan munquma. Mopa ta tu mindangazdangaz duma bunun, manahiavhiav kuzakuza, pakasihal pakadedaz tu miqumis ang.

待人要像對待自己一樣。前輩教我們，老者要憐愛小孩、壯年者要努力工作、小孩要聽老者的勸戒。在學校要認真讀書，不可懶惰打架。在家聽從父母，是我們的待人之道。

布農族有待人禁忌，小孩不可輕視或遺棄長輩。禁止在人前放屁、說謊話或隨意拿他人之物。禁止惡待孤兒、輕蔑跛腳和眼瞎的人、禁嘲諷傻瓜和死了丈夫的婦人。吃肉要按父母的分配。客人用餐，客人先吃，不可讓客人餓肚子，因鬼會把東西吃光。所以，待人要慷慨。