朗聲四起

yau ussiq ta tuRabi na lezun deddan, miRi iku ta pispisan, maRaw pasa tati, mai tu qitun, lazat ta lazanan, niuzep ti sinut na leppaw meniz, wan ti ma sinut na lazan, dimusmus ya uzan, mai ma qatayta nianiana, azu maipil ku yau kitut suni satezay, patapunan ta menanum tu kahuy qanengian na anem,  kasianeman ku masang matapun ita naquni ita, mawtu isu mai tu sunsuni. azu pilay isu, mazas tu kitut bangsis na tungus su, qawqawman suppaRan ku tu yau ti isu mawtu. qadupasan su buqes ku, zais ku, suppaRan su qaya, ta aneman ku melizq iku timaisuan, wanayka pameng ma iku metawa.

temawik isu tu mazemun lazat, nizu nazau waway su temawik, suppaRan ku tu mawtu ti isu, pasasani isu, mai metenes tumqez ta ussiq qizuanan, mai ma iku tu lawad sidadak timaisuan, kingngan ku isu ta kayalan ku sikawma, metawtawa, semasanu tu nianiana nitaytan su, nikasianeman su, naquni ita matazai, yauzuma saqabian ita madded ta suwayan, bettuan, ta buqanan pakungku tu qenapilay su, naquni ita masang, madded ti nani pasasani ti nisikawman ta, yau kitut qenataRaw na anem ku, qenasizenges ku timaisuan ngid ti qakalingun ku, melilizaq pama isu mawtu muman kemilim timaikuan, wanayka tangi ay aisu, padames tu masang tumsuR pasa tiRan qenatuRpus su. aisu ta aneman ku, azu mai qenanaman ku ay, wanayka suppaRan ku sepezan ku isu ta teReq na anem ku, qawqawman azu qenanaman ku ay, sazemaken iku sizenges isu timaikuan, nayau qenasizenges ku timaisuan qaya, qawman yau qenasasetaR na tazusa ta seRay kenasianem ta, yau azu timaisu ay tatezuma ay kaput ni? ta tennub na banang kintani ma azu aiku ay? pasi tumuy iku tu ta liman ku ay awa, semubat timaisuan, Raqana, yau isu sikawma, mai iku ngid ketun tu sikawman su, nabetan ku anem ku, melimek iku mipil tu sikawma su, mai ku ngid ketun tu sikawman su, muwaza nisanu su tu nianiana nitaytan su, niqatazai su qenalizaqan su ay lazat ta tati, melizaq iku mipil qaya. kikiya ma, tungus na bangsis su mai ti masingt ku, suppaRan ku wiyati isu, azu Rameneng ti iku, maipil ku muman yau kitut suni satezay seRay bangsis na kahuy kemuliseng ta pispisan, kasianem iku, nizan su ti pazukat sasikawman su ni.

冬日的夜晚，站在陽台邊，望著細雨與朦朧的街景，路上已沒有人車，只剩屋裡的燈光和若有似無的音樂，你飄忽不定的來了。有一個像你這樣特殊的朋友？世上又有幾人像我一樣？或許，我該舉起手中的杯子，向你致敬，但又不忍打斷你對我的傾訴，只是靜靜的當你忠實的聽眾。

頃刻間，屬於你的感覺與氣味消失，我突然清醒知道你又飄往其他地方，在走廊上有個小小的聲音和濃郁的咖啡香味，我不禁替你感嘆，不知道你是否有把想說的話說完？