朗聲四起

Tas’a, dusa, tau, paat, hima, nuum, pitu, vau, siva, mas’an. Maaq aipi a imita Bunun tu isisipul, maaq i musiusang a isisipul a, pa’unta masipul tu; mas’an saba siin tas’a suqis saba. Laupakadau ka imita isisipula ula’anin isia Lipuun siin Tauluu tun tu isisipul. Maaq i masipul ata qaimamangsut siin sikaupa na asaun mita uqansaipan tu piaq aingka a, makusia amin Tas’a, dusa... pitu, vau, siva, mas’an tu isisipul ti, maqtu ata tupa tu tas’a vanis, tau ludun, pitu tukii, mas’an laihlaihsapuz, mas’an qan dusa buan, tas’a saba suidaing. Madia mita Bunun vaivivaiv tu isisipul. Na taqu aak laupakadau imita Bunun itu qabasanang tu isisipul.

Maaq i masipul tastulumaq tu bunun a, nitu maqtu maszang masipul i sinsisipul ta tupa tu“paat ”bunun . Asa dau maupa ta masipul tu “ sasaspat ”.

Mailantangus madadaingaz maqusil i titi a, tangusang masipul tu papiaq a mininhamu tu bunun, na’iskaupa ta ka kinulut titi isqusil i bunun, maaq i masipul tu tas’a, dusa... mas’an... mas’an qan vau a. Taquin a maisipula tu “ Haiza ata mamas’an qan vau ”a bunun i-iti minhamu.

Paqpun maaq i masipul i bunun a, nitu maqtu tupa tu tas’a bunun... nuum bunun. Asa dau maupa ta masipul tu “ tatini bunun, dadusa bunun, tatau bunun, sasaspat bunun, hahima bunun, a’a’num bunun, papitu bunun, vavau bunun, sasiva bunun, mamas’an bunun. ” Maaq i tasbanin mamas’an bununa, musuqis munhaan imita Bunun tu isisipul, maszang masipul tu “ mapusan qan tas’a bunun. ”

Maaq i pali’uni kuzakuza a, nitu maqtu maupa ta tupa tu, “ mutas’a kuzakuza… mupaat kuzakuza. ” Asa maupa ti bazbaz tu, “ mus’an kuzakuza, mupusan kuzakuza, mutiun kuzakuza, musipatun kuzakuza... ”

Maaq dau ki masipul tu tinpiaq tu qani’anan a, tupa tu“ tals’an, talpusan, taltiun, talsipatun, talhima, talnuum, talpitu, talvau, talsiva, talmas’an... ” nitu maqtu maszang masipul i qanian ta tu isisipul.

Maaq i masipul maluluskun tu bunun a, maupa ti dau tu, maaq i uka a madadaingaz ilumaq kaupa uvavaz’az ilumaq a, tupaun dau tu “ ungqainputan, ” maaq dau ki ukanang binanau’az tu bananaz siin ukanang bananaz tu binanau’az a, tupaun aingka tu “ Untini’an. ” Maaq i haizin a pakatuszangan a, tupaun dau aingka tu “ undusa’an. ” 

布農族數物件及數任何需要知道數目的時，會使用一、二‧‧‧七、八、九、十的數字。一隻山豬，三座山，七點鐘，十節火車，十二個月，一百元等。數算家人。分食豬肉，論及作工次數，算群居，算次序，幾點，有相關的使用方式。