朗聲四起
aicu a kiniseljangan tua sivaikan na ’adav a kadjunangan, pinaretimaljimalji saka pinakaizuazua aicu a ’uljav. sa aicu a ’uljav i kadjunangan, maruanga za iga, a ljemitaita a pavalit tua sipaljizav tjanuitjen. ayata numaumalj a ’adav maljian a ’uljav a tja pacucunan. natemalidu aravac aicu a ljinaungan na ’adav a ’uljavan!
nu venuciaciar a ta’apulupuluan a vuljutan(puluc), me’udjidjilj a gemaduan, maru pasemalamalav tu kaljaveveananga aya! nu makesanga va’u kata malumanga kamaya, pacunitjen ta navurav a ta’umaan a puva’uan katua pukamayan. napenakaleva aravac! sa nu nazemalangezang, pa’ulid tu kaljazalangezangananga! nu pacunitjen tua buljabuljas a asav na dja’as patagilj a maurag, kaljauragananga ayaitjen. saka nu name’udjilj a asav na sangkilj sa vuceleljanga, kaljavuceleljananga ayaitjen!
aza mareka ’uljav na vuciar, savid a nganguangua’an, savid a napenadjalim, nu pacucunitjen, kisaseljang a mesarengua’ a tja varung.
sa pacuni a zemiyaziyan itua puhanan a mareka kalabiabi, maretimaljimalji a ’uljav na valjanga. izua za nakisumalji tua nguangua’ a palalj, nua u’aljay a padavatan auta, temalidu aravac.
azua djemaladjalan, liav a mapacucun a nganguangua’an a hana a navenangalj i tua penalingulj a ’apaz! izua za vucelacelay a calivudu’,
’udjidjilj a tjavuvuk, katua ’ulivalivay a ljangi(ljadreges), maretimaljimalji a ’uljav nua hana a balaybaybay! izua matu kilji’ulji’u tjanuitjen!
ka kakedrianamen nia kuku nia salasaladj, a ’uljimamarav kata
’uljicacingelav, temalidu aravac nu pacacikecikel, a makateku a makavavav a miperperper! matu tjemuatjuap, tjanuitjen dri! aicu a ljinaungan na ’adav, a sinialang tua mareka’uljav, tjengelayitjen taliduitjen a pa’ulid! saka titjen a mapuljat, uljatjen a napenaula nakiljivak, tua tja kinaizuanan a kadjunangan!
大地隨四季呈現不同的景色。木棉花開時春天到了。小米或芒果成熟時是豐收的夏季！九芎樹葉呈現土褐色，那是秋天了！山上的楓葉變紅，是冬天到了！那些綻放花朵鮮豔亮麗！翩翩飛舞的蝴蝶，五顏六色很吸引人！藍腹鷴雄鳥的羽毛，更出奇鮮艷！
天空最美的時候，是火紅的夕陽和不同顏色的彩虹，排灣族以彩虹形容艷麗，自然的色彩這麼美！我們要好好愛惜，不輕易破壞，多親近大自然，做好環境保育，使我們永遠生活在大自然色彩的豐美中。